E propuesta di AVP pa un aumento e pensioen di behes di 50% ta sigui ricibi un respaldo cada bes mas grandi, no solamente den comunidad, pero te hasta for di academico local, stranhero y e propio expertonan local den e tema.
Den e mesun siman cu a keda publica un rapport di profesornan di Universidad di Aruba y Merca, confirmando e situacion dificil cu adulto mayor ta enfrenta na Aruba, director di SVB, ingeniero Edwin Jacobs, ta reconoce publicamente cu reparatietoeslag ta e herment mas efectivo pa alcansa e obhetivo aki. Reparatietoeslag a worde introduci dor di gabinete Mike Eman na 2011 y tur anja tabata haci ahustenan pa sostenen salarionan bao di 2500 florin y suplementa pensioen di nos grandinan. Pero durante 7 anja di Gabinete Wever Croes ta masha poco ahuste di reparatietoeslag tabata tin. Ta pone apenas 30 florin pa tapa un buraco di 700 florin cu Gabinete Wever Croes mes a pone. Mr. Mike Eman ta contento pa tende di director Edwin Jacobs cu repartietoeslag ta e vehiculo pa aumenta e placa di pensioen di nos grandinan. “Esaki ta exactamente locual nos ta bai haci, mr. Mike Eman” ta envatisa, nos ta bia pone 700 florin riba e pensioen di nos grandinan pa medio di aumento di reparatietoeslag”.
Di nan banda, miembronan di Gabinete Wever-Croes II, manera Minister di Finanzas Xiomara Maduro ta sigui cabes duro di bisa cu e aumento indispensabel aki no ta posibel.Ta hopi cla cu MEP, ni su aliadonan tin e boluntad di bin cu un solucion, entre otro pasobra nan lo mester admiti, e ora, cu nan ta parti di e problema.
E respaldo publico, ademas di e resultadonan di e studio academico, ta resalta e urgencia pa tuma paso concreto pa alivia e dificultad economico di nos ciudadanonan di edad halto.P’esey AVP ta ratifica su compromiso di traha incansablemente paobtenee mandato necesario cu lo permiti dirigi e isla durante e proximo cuater aña.
“E testimonionan aki ta valida nos propuesta, ademas di fortalece nos determinacion di implementa cambio real cu ta beneficia nos adultonan mayor. Nos no por sigui permiti cu esunnan cu a contribui tanto na e pais cu nos tin awendia, ta biba den condicionnan asina precario,” lider di partido, Mike Eman a expresa.
AVP ta sigura cu, na momento di asumi mandato, lo tuma medida inmediato pa aumenta substancialmente e pension minimo di behes y alivia e desafionan cu adultonan mayor ta enfrenta, incluyendo e cobramento inhusto di belasting riba nan entrada di pensioen.
Esaki ta djis un parti di e compromiso cu e partido berde tin pa un Aruba mas husto, unda cada ciudadano por biba cu dignidad y siguridad financiero. Cu e obhetivo aki den mente, AVP ta haci un yamada na tur Arubiano pa uni na nan lucha, di apoya esunnan cu mas tin mester di dje y sigura asina un futuro miho pa nos tur.