Minister Ursel Arends ta solidario cu e grupo di hoben activista Nigel Maduro cu nan lucha mirando cu e lucha cu nan tin pa naturalesa ta e mes un lucha cu gobierno di Aruba tin pa naturalesa di Aruba.
Pa varios aña a sigui crecemento economico y a laga naturalesa un banda y den e ultimo tres añanan gobierno di Aruba a trece naturalesa y economia den balans cu otro pa asina proteha naturalesa. Tin un concepto di ley riba derecho di naturalesa cu ainda mester yega parlamento y lo mester conta cu dos tercera parti di parlamento pa por reconoce derecho di nos naturalesa den nos constitucion y di e forma aki tambe ta duna naturalesa e balor necesario. Segun minister di medio ambiente Ursel Arends banda di esaki tin e maneho cu a keda introduci algun aña atras door di ex minister Oduber Build With Nature , ta rapportnan cu gobierno di gabinete Wever Croes ll a pasa door di nan y adapta pa asina por sigui percura pa desaroyo y naturalesa ta den harmonia cu otro.
Segun minister Ursel Arends otro siman lo presenta full un presentacion di e MB cu ta e maneho pa naturalesa National Biodiversity Strategy & Action Plan cu ta duna con den e siguiente 10 añanan lo mester atende cu naturalesa na Aruba. Pa por yega na e maneho aki a haci esaki cu participacion cu tur e stakeholders cu ta encera tanto di sector publico y sector priva pa asina yega na e maneho di naturalesa cu lo keda implementa pa e proximo 10 añanan.
Tin hopi trabou pa haci y por mira esaki tambe cu henter comunidad di Aruba tin preocupacion riba naturalesa di Aruba y na unda cu e grito y pasion pa naturalesa a crece y esaki ta importante pa bin cu cambionan necesario. Nos naturalesa nos tin cu proteha esaki y sigur na momento cu nos ta papia di turismo , naturalesa ta nos economia y naturalesa ta nos turismo tambe. Segun minister Ursel Arends ta keda na cada un di nos pa proteha nos naturalesa pa asina nos isla por sigui florece y nos economia por sigui prospera.
