E promer Minister President di Aruba, mr. Henny Eman (76)ta den un situacion critico pero stabiel den Hospital. E a worde interna riba anja nobo cu urgencia y awe durante di tabata dialisa – cu e a inicia recientement – e a haya un complicacion cu su curason cu a pone den estado critico. Famia Eman a worde yama na hospital den urgencia pa reuni cu mediconan. Ruman mas chiquito, mr. Mike Eman, tabata bishitando cas di nos grandinan cu serenata pa anja nobo ora e a worde yama cu urgencia pa hospital pa e situacion critico di Henny. E estadista grandi aki di Aruba ultimo anjanan ta sufriendo cu un serie di reto cu su salud.
Mr. Mike Eman a informa prensa cu su ruman ta hopi fragiel, pero stabiel na e momentonan aki. “Su condicion ta hopi delicado y e proceso di dialyse ta pone un peso mas grandi riba su curpa. Nos ta pidi nos pueblo pa tene den oracion y cu nos Creador dune forza pa e supera e crisis aki”.
Desde algun anja awor Henny Eman e confronta un cumulacionn di contratiempo cu su salud. E situacion a empeora atrobe hustamente riba anja nobo cu e mester a worde enterna cu urgencia na hospital. Su senjora, jiunan, rumanan y sobrinononan tur a bin hunto na Horacio Oduber Hospital.
Henny Eman tin un carera imprecionante di tres Gabinete y ta reconoci como e homber cu e vision y e liderazgo pa a crea e industria turistico moderno di Aruba despues cu Lago a sera. E industria riba cual henter Aruba ta depende awe. Tambe e a lider Aruba den e temonan dificil cu Aruba a bira Pais ariba su mes como e Promer Minister President na anja 1986. Den seno di famia Eman e ta ruman grandi cu a juda carga e famia na un edad hoben dor di temponan dificil cu nan tata Shon A a fayece y a laga 8 jiu un viuda atrás. Famia Eman ta keda positivo, cu poder di Dios, Henny lo por recupera for di e crisis aki tambe.