Despues di a huramente como Parlamentario dia 7 di Juli, e lider di Partido MAS, Marisol Lopez Tromp a dicidi di bay c’un vacacion largo na Hulanda, ya cu su meta di drenta parlamento un biaha mas, a keda cumpli.
Siman pasa Marisol no tabata den Parlamento ora cu tabatin e bijeenkomst pa Prome Minister y gobierno duna informacion pa loke ta introduccion di leynan di COHO y RAFT ya cu vacacion personal ta Sagrado pa e parlamentario di MAS riba e interes general di pueblo.
Marisol y su Partido MAS a bira un di e sorpresanan di ultimo eleccion ora cu el a logra dos asiento c’un lista di solamente nuebe candidato, loke a confirma su popularidad den pueblo a wordo gana bek despues cu el a cay bou di 500 voto den eleccion di 2017.
Usando un scenario di corupcion den gobierno anterior, Marisol a traha su plan pa drenta bek sea den gobierno of den Parlamento y si mira resultado di eleccion, por bisa cu e lider di MAS riba su mes a saca ambos asiento cu su partido tin actualmente.
Awor ta lanta e pregunta si acusacionnan dirigi contra su ex lider di POR Otmar Oduber ta acusacionnan berdad of ta simplemente parti di su wega politico, caminda el a uza un scenario of plan politico bon hinca den otro, pa pone otronan mustra malo, mustra corupto, pa asina e saca probecho di esaki loke el a logra tambe.
Te ainda ningun hende sa kico ta e acusacionnan cu Marisol ta papia di dje, kico e casonan di corupcion cu tin of kico mas el a descubri cu e pone cu gabinete anterior a core cu su persona for di gobierno.
Durante di campaña Marisol a papia hopi di corupcion, tambe el a papia di trahadonan spirito pero awor den Parlamento, ta su persona ta e spirito ya cu ainda e no a duna cara den Parlamento den representacion di su partido MAS.
Despues di eleccion Marisol a mustra di lo tabatin un pacto forma caba cu otro dos partido chikito cu ta Acccion21 y RAIZ caminda e tres partidonan aki cu a logra hunto cinco asiento, lo a bay determina cu cual partido nan lo forma un gobierno di coalicion pero RAIZ pa medio di su lider Ursell Arends, a desbarata e ponencia aki rapidamente.
Arends a declara na prensa cu su partido lo no ta parti di ningun complot y asina e plan grandi di Marisol a fracasa, esta di hunto cu e otro dos partidonan chikito, cera cabes y forma un gobierno di coalicion cu AVP, pa asina e lo a castiga MEP pa loke nan a haci cu’ne sacand’e for di gobierno.
E plan ey pues a fracasa y awor Marisol ta den banki di oposicion, cu AVP y Accion21 pero sin cu nan tin mayoria.’
