Den e promé dos simannan di mart, Gobièrnu di Kòrsou a tene su promé seshonnan di informashon pa stakeholders den kuadro di e trayekto di reforma i rekonstrukshon “Un Etapa Nobo”. Un kantidat representabel di e sektor empresarial, Tim di Maneho / Rekurso Humano di Gobièrnu i tambe un grupo inisial di Sindikato, a risibí informashon tokante di i kontesta riba e Pakete Pais Kòrsou (Landspakket).
Komo parti di e sosten di likides, Kòrsou i Hulanda a firma un akuerdo pa ehekushon di e ‘Landspakket’ ku tin komo meta alsa kalidat di bida di pueblo i fortifiká maneho finansiero i ekonómiko di pais. A base di esaki, Gobièrnu a bin ta kana un trayekto di komunikashon – den kuadro di transparensia i interkambio – riba implementashon di e inisiativanan ku ta resultá for di e akuerdo fihá den un agènda di ehekushon.
Propósito di e seshonnan di informashon akí ta pa aklará i kontestá preguntanan ku stakeholders por tin. Alabes pa inventarisá puntonan importante ku ta bini dilanti den e seshonnan. Gobièrnu lo sigui bin ku mas seshon di informashon den luna di mart pa yega na tur grupo Sindikal.
E seshonnan di informashon ta keda organisá pa e Tim di Kordinashon i Monitoreo (representashon di Kòrsou den ehekushon di e ‘Landspakket’) en koperashon ku Direktorado di Komunikashon i Informashon.
1 comment