Promé Minister/Minister di Hustisia Gilmar Pisas a tuma nota di un akto heroiko ku a tuma lugá ku un Agente Polisial dia 20 di febrüari 2022.
Riba e fecha menshoná Sentral di Polis a risibí informashon ku un mucha di 2 aña a kai den pisina di un kas.Na yegada di Polis a konstatá ku ya algún familiar tabata trata di reanimá e yu aki, kual su situashon tabata mustra di ta hopi krítiko.
Na momentu ku Agente Polisial sr. Otniel d’Aguiar a yega i mira ku e Mama di e yu tabata purba di reanimá e yu, e la pidi e Mama pa e por kordiná e proseso di reanimashon aki hunu kuné.
E kordinashon aki a duna fruta, debí ku e dos personanan aki a logra pa skapa bida di e yu di 2 aña. Un agente Polisial atento i determiná huntu ku un Mama ku e balentia i kurashi nesesario pa skapa bida di su yu.
Promé Minister/Minister di Hustisia sr. Pisas ta aploudí e aktuashon rápido aki i heroiko di parti di e Agente Polisial sr. Otniel d’Aguiar. E la protehá i sirbi manera debe ser.
Bo por ta orguyooso awe ku abo a yuda pa skapa bida di un ser humano. Kòrsou ta orguyoso di bo.
Na nòmber di Gobièrnu di Kòrsou danki pa e bon trabou ku bo a desplegá.
