Dia 20 di januari Prome Minister Evelyn Wever – Croes a ricibi carta di sindicatonan cu peticion pa aclaracion riba e tema di recorte di 7.6% di salario.
A traves di un carta cual a dirigi na sindicatonan dia 23 di januari, Prome Minister a contesta sindicatonan basa riba palabracionnan haci cu Gobierno di Reino.
Prome Minister Wever – Croes a splica cu e tema di recorte di 7.6% lo ta riba agenda di Conseho di Minister di Reino di 27 di januari proximo. Pero ya caba, Gobierno di Aruba a cuminsa haci tur preparacion pa na juni 2023 paga e vakantie-uitkering completo y e premies di augustus y november. Pues Aruba ya a tene cuenta cu e fondonan aki den presupuesto 2023.
Premier Wever – Croes a sigui splica cu e base legal pa por stop e inkorting di e 50% di vakantie-uitkering y di e premies tambe a wordo formalisa entrante 1 januari 2023. Ademas a cuminsa retene e extra loonbelasting cu mester retene pa percura cu e vakantie-uitkering ta wordo paga completo, pues 100% y sin cu ta kita belasting for di dje. Esaki manera cu tabata bin ta tuma luga e ultimo añanan, Prome Minister Wever – Croes a expresa. Esaki por nifica cu den e siguiente lunanan, e trahado lo bay paga poco mas di loonbelasting, pa asina e por haya e vakantie-uitkering na juni, sin cu ta re tene impuesto riba dje.
Mas informacion acerca di e topico aki ta disponibel riba e website di DRH. Premier Wever – Croes ta dispuesto pa reuni cu sindicato riba e tema aki den caso cu tin tin e necesidad pa mas aclaracion.
