En conexion cu Siman di Buki pa Mucha, Director di Biblioteca Nacional, Señora Astrid Britten y sra Boekhoudt a trece e buki oficial di e di 29 edicion di Festival di Buki pa Mucha cu ta inicia oficialmente diabierna 5 di November. E titulo di e buki aki ta “Ta loke bo kier ta”. Prome Minister Señora Evelyn Wever-Croes, Minister di Enseñansa y Deporte Señor Endy Croes y Minister di Finansas y Cultura, Señora Xiomara Maduro a ricibi e buki aki.
E Siman di Buki pa Mucha ta inicia awe cu un procuccion hopi bunita na TeleAruba pa 7.00 pm, un tiki diferente e biaha aki door di protocol cu mester tene cuente cu ne debi na Covid. Señora Zetsia Ponson ta encarga cu e proyecto aki. Den e programa lo lansa e di 29 edicion di Festival di Buki pa Mucha.
Mi ta invita pueblo di Aruba y mayornan cu tin yiunan chikito en general, pa sintonisa e apertura di Siman di Buki pa Mucha diabierna anochi via TeleAruba pa 7or di anochi. Siman di Buki di Mucha ta un bunita celebracion di lesamento cu nos por brinda nos muchanan. Ban stimula nos yiunan y nos nietonan pa nan desaroya e habito di lesa buki. Lesamento ta habri un mundo di conocemento nobo pa cada mucha y nan lo experiencia aventuranan inolvidable”, Prome Minister Evelyn Wever-Croes a expresa.
