ORANJESTAD, Aruba
Pa 5 luna caba Aruba y mundo henter a wordo afecta hopi pisa pa motibo di Covid-19. Hogarnan a sufri financieramente door di perde entrada completo of parti di nan entrada.
CEDE Aruba ta organisa e fin di siman aki un evento di solidaridad pa asina nos pueblo demostra e gran curason patrio pa nos conciudadanonan. E Tele y Radioton Nacional “Happy to give back!” lo tuma luga e fin di siman aki.
Emisoranan di Aruba /Media en general manera mayoria compania na Aruba, no tin’e nada fasil den e temporada aki y ta di admira pa wak con 10 radio y Canal di TV ta bini hunto den tempo dificil aki pa e bunita causa aki. Prome Minister ta expresa gratitud na tur.
“Union den nos pueblo ta locual nos mester mas cu nunca. Ta UNI so nos lo vence tur obstaculo den bida.
Como Prome Minister di Aruba mi ta sigur cu hunto nos lo vence e crisis aki y lanta nos Pais bek.
Mi ta invita tur hende cu por, pa haci un donacion durante henter fin di e siman aki den caya grandi dilanti Elite Studios. E por ta di 1,- florin mes, unda esaki lo bay pa yuda entre otro:
– Fundacion Pa nos Comunidad,
– YMCA
– Ban Uni Man Pa cria nos muchanan.
Covid a dal nos pais hopi duro, pero tambe ta saca lo mas grandi y mas bunita di Aruba, unda nos tur ta bini hunto pa yuda pa un bon causa”, Prome Minister Evelyn Wever-Croes a expresa.
Pa mas informacion bishita e website: https://happytogiveback.com/
