Diasabra mainta, cuminsando su dia cu el a haci aña, Prome Minister Evelyn Wever-Croes a asisti na e evento di Stichting Faciliteiten Scouting Aruba, SFSA. E centro di scouting y di campamento SFSA a finalisa nan facilidadnan renoba y nobo cu lo yuda pa e trabou grandi cu e organisacionnan aki ta haci pa nos hobennan.
“Mi ta hopi impresiona cu e buniteza di e centro di scouting y di campamento SFSA pero tambe mi a keda hopi impresiona cu e paz y trankilidad cu e luga ta brinda. E luga ta transmiti un zonido di e hobennan cu ta inspira bo y ta duna e siguridad di sa cu eynan tin adultonan, lidernan cu ta traha cu nos hobennan, yuda nan, formanan y unda tin mester, trece nan bek riba e bon caminda”, Prome Minister a duna di conoce.
Prome Minister, hunto cu sra. Sharine Geerman y miembronan di Aruba Blacktie Foundation, cu ta un fundacion cu tambe a yuda cu recaudacion di fondo pa e proyecto wordo realisa, a haya un recorido y a admira e beyesa di e centro y tur loke e centro por brinda nos hubentud.
Premier di Aruba a felicita e centro cu e renobacion di nan facilidad y e construccion di un modular cu lo wordo uza pa sala pa tene reunionnan, cursonan y charlanan. E logro aki sigur ta danki na e esfuerso conhunto di hopi hende.
Prome Minister a gradici tambe SFSA pa e bunita trabou cu nan ta haci cu ta impagabel y cu un balor enormente grandi. Tambe Prome Minister a gradici nan pa e bunita bouquet di flor cu el a ricibi pa su cumpleaño.“Den un comunidad manera Aruba, y especialmente awo cu Covid, ta tuma nos tur pa yuda nos pais. Mi ta gradici boso tur pa e trabou cu boso ta haci pa nos Aruba. Danki di curason tambe na tur esnan cu a yuda realisa e proyecto aki pa nos hobennan cu ta e fundeshi di nos pais”, Prome Minister a bisa den su discurso cortico diasabra mainta.
