Como simbolo di gradicimento pa engrandece nos dushi Carnaval
Aruba ta den pleno celebracion di Carnaval 69. Carnaval ta parti di nos cultura. Cultura ta e vinculo cu ta uni un pueblo. Cultura ta trece felicidad y ta caba cu disunion. Den e aña di Union y Positivismo, despues di a pasa den un pandemia cu pa dos aña a paralisa nos dushi Carnaval, a yega e momento pa un biaha mas celebra y disfruta di nos Carnaval pa asina hunto y cu hopi positivismo engrandece nos cultura, nos Carnaval.
Diadomingo ultimo, a tuma lug ana Bestuurskantoor e traspaso di mando na nos realezanan di Carnaval 2023. Un evento masha bunita prepara pa Gobierno di Aruba na unda cu colornan y creatividad di nos hendenan carnavelesco a resalta mahestuosamente. Tur Prins y Pancho, tur Reina, chikito, hoben y adulto, a presenta na Bestuurskantoor pa e ceremonia aki. Y e union di nos monarcanan di Carnaval a resalta den tur positivismo y alegria.
Prome Minister Evelyn Wever-Croes, durante parti di e actividad, a entrega cada monarca di nos Carnaval un pin di bandera di Aruba como un simbolo di gradicimento na tur pa engrandece nos Carnaval y haci e vinculo di union mas fuerte pa nos pueblo.
“Danki na nos monarcanan di Carnaval. Danki pa boso aporte na e manifestacion cultural di mas grandi di nos pais. Mi ta desea y spera cu e pin aki, keda como un recuerdo di Carnaval 69 pa cada un di boso cu ta explota boso creatividad pa brinda nos pueblo un bunita Carnaval”, Prome Minister a expresa.
