Cada trahado ta weso di lomba di nos pais’
Dia di Obrero ta brinda nos e oportunidad pa para keto y reflexiona riba e importancia di nos obreronan na Aruba, e clase trahado, e weso di lomba di nos pais. Prome Minister Evelyn Wever-Croes ta felicita y desea tur ciudadano di nos pais, nos obreronan un feliz dia y ta laga e mensahe pa cada obrero di nos pais pa sigui cu energia y animo pa duna e miho di cada un na nos pais, nos famia y nos mes.
“Mescos cu mi colega, Minister di Labor ta bisa; ‘Bo labor tin balor, e tin hopi balor. Aruba ta saliendo for di efectonan devastador di e pandemia. Nos a pasa den momentonan hopi dificil pero aworaki nos ta mira padilanti cu perspectiva y hopi speransa y esey ta danki na bo labor durante bon tempo, menos bon tempo y durante mal tempo. Ohala cu riba e dia aki, cu e reflexionnan di Dia di Obrero por duna abo tambe e energia y e animo pa sigui duna di bo parti pa nos por hiba Aruba padilanti.
Pabien Aruba riba Dia di Obrero y cu Dios bendiciona nos clase trahado riba nos pais.
