ORANJESTAD,Aruba
Pa hopi hogarnan na Aruba, yen di preparacionnan ta tumando luga e dianan aki.
Studiantenan ta preparando pa bay sigui nan estudio den exterior y mayornan ta preparando pa wak nan yiunan habri hala y bay busca nan futuro. Prome Minister Evelyn Wever-Croes ta desea tur studiante exito y ta desea cada mayor forsa na momentonan dificil pa wak nan yiunan bay pero cu e Consuelo cu nan lo bolbe Aruba como profesionalnan pa yuda nos engrandece nos economia.
Mi kier a desea e studiantenan hopi exito cu e etapa nobo aki. Un conseho mi kier duna ta: Fiha bo meta y no permiti nada ni ningun hende stroba bo den logra bo meta. Corda cu unda cu bo bay bo ta un embahador di pais Aruba y no lubida cu bo por haci bon propaganda pa Aruba unda cu bo ta. Bay y bolbe bek cu un titulo den bo man pa bo por yuda nos sigui maneha y hiba nos pais padilanti.
Na mayornan, mi ta kere cu probablemente esaki ta un di e momentonan mas dificil caminda nos como mayor ta wordo pidi pa habri brasa pa laga nos yiunan habri nan hala y laga nan bay. E ta duro y dificil pero bo mester confia cu e fundeshi solido cu abo a dun’e tempo e tawata cerca bo, ta su guia den e etapa nobo aki. Dios bendiciona bosonan tur”.
