ORANJESTAD,Aruba
E consternacion bou pueblo ta grandi ainda. Con un persona cu no tin e confiansa mas di e partido cu a bay eleccion ainda ta sinta riba e stul di Gobernante.
Na Hulanda un situacion asina sigur lo no a surgi pasobra den tempo corto e mandatario lo a tuma honor na su mes y tuma su retiro. Si e ta bisa cu e tin cosnnan pa investiga mes, e mester entrega esaki na e autoridad concerni, cu no ta su persona.
E situacion ta bisto, Marisol Lopez Tromp no tin e apoyo di POR, pues e ta un politico independiente pero no por ta un minister, a menos cu e partido, cu tin derecho riba e puesto di Minister, apunte den tal posicion aunke cu e no ta riba nan lista mas.
Aruba tin suficiente problema y preocupacion na e momentonan aki pa un persona indvidualista trece of kita tempo cu Conseho di Minister y Prome Minister mester dedica na gobernacion.
Esaki ta motibo tambe cu, segun analistanan, Prome Minister Wever Croes, mirando e movecionnan haci door di Marisol Lopez Tromp cu ta bay en pugna cu Acuerdo di Gobernacion, segun e partnernan, a dicidi di pone un manda. E no a baha Marisol Lopez Tromp como mandatario, sino a kita autoridad for di dje, pa e no por tuma decision. Esaki ta un decision temporal. En espera cu Parlamento, cu ta den reces yama reunion y tuma e decision pa bah’e como mandatario.
Prome Minister a hay’e ta tuma e decision aki pa mantene paz y trankilidad, na momento cu Aruba ta den un pleno crisis. No tin tempo pa soluciona problema interno di otro ppartido, pa cual ta miho kita autoridad di e mandatario pa por sigui atende cu e crisis di e isla. Aruba na e momentonan aki no por permiti su mes e luho di bay eleccion, cu ta bay costa caha di Gobierno basta placa.