Diaranson mainta, Prome Minister Evelyn Wever-Croes hunto cu Minister Rocco
Tjon a reuni cu Minister di Defensie di Hulanda, señor Ruben Brekelmans cu ta di bishita na Aruba pa
un dia pa un reunion cu Gobernador, Gobierno y Mariniers Kazerne riba e situacionnan cu Marina
Hulandes ta encarga cu ne.
Prome Minister a indica cu no ta un secreto cu e situacion na Venezuela ta preocupante, no solamente
pa Aruba sino pa Hulanda tambe, y p’esey gran parti di e reunion tabata basa riba e tema aki, y con
Aruba ta prepara pa cualkier eventualidad. Prome Minister a duna di conoce cu aunke e situacion cu
Venezuela ta aden no te e miho, comunidad di Aruba por ta trankil mirando cu actualmente no tin
ningun indicacion di riesgo of menasa pa nos isla.
E plan pa 2025 ta pa Aruba y Hulanda sigui traha hunto riba e desaroyo di mas plan pa asina den caso
di cualkier eventualidad, of si tin infiltracion di forsanan di otro pais via Venezuela pa ataca Aruba, cu
nos ta bon prepara y no mester tin ningun preocupacion.
Durante e reunion tambe a elabora riba e tema di e posicion di e Arumillers. Prome Minister a indica
cu Gobierno ta den e fase pa profesionalisa e Arumillers pa asina e personanan cu ta Arumil haya un
posicion mas fuerte ancra tanto den ley como den nan posicion huridico como militar. E proyecto aki
ta den su fase final y ta danki na e bon cooperacion cu tin entre Aruba cu Hulanda.
Por ultimo tambe a pasa riba e tema di gobernacion y e relacion cu tin actualmente entre Aruba y
Hulanda, y con por fortifica e relacion aki pa yuda nos aki na Aruba un poco mas.
"E reunion a bay hopi bon, y mi ta contento di por a scucha con Aruba ta preparando su mes riba tur
tereno, tanto cu Marina aki na Aruba, y cu defensa di Hulanda, pa asina comunidad no mester tin
ningun preocupacion pa loke ta desaroyonan den nos region", Prome Minister a expresa.
