Prome minister Gilmar Pisas a ricibi e hefe di e delegacion di Union Europeo na Guyana

Prome Minister di Corsou  sr. Gilmar Pisas a ricibi e hefe di e delegacion di Union Europeo di Guyana sr. Rene van Nes dia 1 di september 2023.

Esaki tabata un bishita di cortesia pa sr. Van Nes por a cera conoci cu Prome Minister sr. Pisas y alabes elabora riba e diferente proyectonan cu ta keda financia pa Union Europeo na Corsou.

Durante di e combersacion na Forti a elabora riba e structura cu actualmente tin na Corsou cu ta atende cu e parti di fondonan for di Union Europeo (Ministerio di Asuntonan General pa cu fondonan di EDF  y Ministerio di Desaroyo Economico pa cu e fondonan non-EDF), proyectonan cu a finalisa (10e EOF), pero tambe riba proyectonan cu ta preparando den futuro (11e EOF).

A elabora tambe riba e programa di DOAG (decision overseas association including Greenland), e facilidadnan di TAIEX ((Technical Assistance and Information Exchange instrument of the European Commission), y tambe riba e structura di comunicacion cu lo bay hiba cu e hefe di e delegacion di Union Europeo, pa asina fortifica e cooperacion mas y pa Corsou por yega na mas informacion riba e diferente fondonan cu ta disponibel pa medio di Union Europeo.

Despues di e combersacion a sigui cu un recorido caminda a bay pone un plakkaat den cuater bario na Corsou, caminda a haci uzo di e fondonan di Union Europeo pa diferente proyecto. Ta trata aki di e barionan di Nieuw Nederland, Sapaté, Kortijn y  Tera Kòrá.

Sr. Van Nes a keda satisfecho cu e combersacion y alabes e ponemento di e plakkaatnan caminda ta duna reconocemento na e sosten di parti Union Europeo. Prome Minister sr. Pisas tambe a keda hopi satisfecho cu e bishita di sr. Rene van Nes.