Prome Minister sr. Gilmar Pisas, huntuku Minister di Enseñansa, Ciencia, Cultura i Deporte sr. Sithree van Heydoorn, Minister di Hustisia sr. Shalten Hato, Minister di Maneho di Gobernacion, Planificacion i Servicio Publico sr. Ornelio Martina i e tim di coordinacion di SDG, a hisa e Bandera di SDG na Fort Amsterdam, den cuadro di e siman i Dia di SDG, 25 di september 2023.
E otro Ministernan di Gabinete Pisas II no por tabata presente debi na otro compromisonan di trabou (e.o. tambe den exterior) cu tabata rekeri nan presencia. Durante di henter e siman aki lo bay tin diferente accion, conscientisacion i ponemento di atencion riba e obhecionnan di cada un di e metanan pa cu desaroyo sostenibel (Sustainable Development Goals: SDG’s).
E metanan principal ta pa durante di e siman aki nos por logra:
Inkrementá e compromiso, aspira pa envolvi henter e experto di nos sociedad, incluyendo e sector priva; Sa linea tur sector i NGO’s cu tres di e cinco pilarnan di desaroyo sostenibel: Hende, Planeta i Prosperidad; Crea conscientisacion den nos comunidad pa cu e metanan di SDG, enfatisando e Agenda 2030 di Corsou i su implementashon. E conscientisacion lo ta e prome paso pa cu un accion significativo;
Comparti e miho practica nan local, regional i e konosementunan global, pa asina por implementa e metanan di SDG den un forma efectivo den e agenda local.
Despues di e actividad di hisamento di e Bandera di SDG, Prome Minister tabata orado principal na e Virtual Islands Summit, cua ta un evento cu ta na vanguardia pa conecta islanan for di rond mundo ya pa 5 aña caba i cu ta conta cu riba aproximadamente 10.000 participante durante e webinair aki .E organisado Island Innovation a keda sumamente contento cu Prome Minister sr. Gilmar Pisas por tabata “live” den e webinair aki. Prome Minister sr. Pisas su mensahe tabata encera desaroyo duradero, resiliensia i colaboracion cual ta esencial pa nos logra Metanan Global 2030.
Tambe el a vocifera cu islanan no ta victima nan pasivo, pero buscadonan di solucion. E islanan ta cana dilanti pa logra metanan global 2030.
