Recientemente tabatin varios delegacion na Aruba pa yuda riba diferente tereno. Un di e delegacionnan ta IMF cu ta reuniendi cu diferente departamento y instancia pa asina yuda riba e tereno di evaluacion cu nan ta haci regularmente. Ademas nan durante di nan bishita, nan ta yuda cu otro temanan tambe manera presupuesto, impuesto y reforma fiscal.
Prome Minister Wever – Croes a splica cu banda di IMF, tin un delegacion cu yama TWO Hulanda (loke lo bira COHO den futuro), cu ta bin Aruba pa papia cu tur instancianan pa hunto cu Aruba, traha riba e “uitvoeringsagenda” di e di tres kwartaal di e aña aki (juli-augustus-september).
“Semper 1 luna prome nan ta bin y nan ta sinta cu tur hende pa nan por haya un mihor bista di kico ta posibel y kico no ta posibel. Den cuadro di esaki a dicidi di laganan mira un parti bunita di Aruba y a tene e encuentro na Savaneta na Aruba Ocean Villas, pa combersa y intercambia ideanan cu nan.”
Aruba Ocean Villas ta di un señora local determina y dinamico, cu a realisa e bunita inversion aki riba propio forsa. Esaki kier a mustra tambe na e bishitantenan, cual ta e poder cu e hende muhe tin ora cu nan propone nan mes.
Terminando, Prome Minister Wever – Croes a expresa cu ta hopi importante pa mantene e relacion bon cu tur e instancianan aki, paso na fin di dia nan ta yuda nos cu evaluacionnan y esey ta algo cu ta aprecia.
