Prome Minister Evelyn Wever-Croes: Ta reuni cu directora di departamento di relacion exterior señora Jocelyne Croes

Prome Minister Evelyn Wever-Croes a reuni cu e directora nobo di Departamento di Relacion Exterior di Aruba, Directie Buitenlandse Betrekking (DBB), señora Jocelyne Croes. Manera ta conoci, e departamento aki ta maneha tur e relacionnan cu Aruba tin cu paisnan, organisacionnan y institutonan internacional. A traves di Ministerio di Buitenlandse Zaken di Hulanda tambe tin bon relacion cu Nacionnan Uni, Union Europeo, y otro institutonan.

Prome Minister a indica cu actualmente e departamento di DBB ta confrontando varios reto incluyendo e reorganisacion cu mester wordo finalisa dentro di poco como tambe e scarcedad di personal. Gobierno tabata wardando pa un director nobo pa asina haya su vision pa cu e reorganisacion di e departamento, pa asina por keda cla cu ne. Pa loke ta e scarcedad di personal, Gobierno hunto cu DBB ta trahando riba un solucion. 

“E reunion a bay bon y tabata uno positivo, na unda cu a haci palabracionnan pa hunto traha riba solucionnan concreto pa asina haci e departamento DBB mas fuerte pa asina tambe fortalece e relacionnan cu exterior mas ainda,” Prome Minister a expresa. 

Comunicado Prome Minister Evelyn Wever-Croes