“Mi no ta un tata di un famia, cu ta consisti di homber y muhe y yiunan. Mi ta un tata particular, tata di un famia grandi, tata di un pueblo, nos pueblo di Aruba.”
25 di januari ta un fecha special pa Aruba. Un dia nacional na unda nos comunidad por goza di un dia liber. Un dia na unda nos ta recorda e fecha natalicio di nos Libertador Gilberto Françios Betico Croes kende, si ta na bida, lo a haci 86 aña.
E amor incondicional di Betico Croes pa un pueblo, su boluntad pa haci un sacrificio personal pa benificia su pueblo, su accionnan incansable pa salba su pueblo, su bondad legitimamente compasivo pa su pueblo, su corage pa enfrenta forsanan grandi pa su pueblo, su noblesa pa sirbi su pueblo, ta haci cu awe su pueblo ta recorde como un heroe, como un tata, como un libertador.
Gilberto François Croes, miho conoci como Betico, a nace dia 25 di januari di e aña 1938 den un famia humilde na Santa Cruz. Su tata tawata Fransisco miho conoci como Panchico, y su mama tawata Mimita Croes-Lopez. Hunto nan tawata tin 11 yiu. For di mucha, Betico tawata hopi stima pa esnan rond di dje. E tawata gusta yuda otro. Betico tawata yuda Pastoor tambe como misdinaar. Algo sigur cu ta di remarca ta cu for di hoben caba, tawata bisto cu Betico un dia lo bira un lider.
Betico a asisti scol basico St.Jozef School na Santa Cruz. Awendia e scol aki yama Colegio San Hose. Despues Betico a bay St. Dominicus College, na unda el a termina su H.B.S. Na aña 1954 pa 1958 Betico a bay Kweekschool na Hulanda na unda el a studia pa maestro di scol. Na Hulanda Betico no a perde oportunidadnan pa demostra su calidad di bira un lider y tawata activo den diferente organisacionnan social Antiyano y tambe tawata organisa reunionnan pa studiantenan Arubiano y Antiyano na Hulanda.
Despues di su estudio, Betico a regresa Aruba y a traha na St.Jozef School como maestro, e mesun scol unda cu el a bishita como alumno. Y despues, Betico a bay traha na MAVO St.Antonius College na Santa Cruz, cu awo ta Colegio San Antonio.
Na Aña 1962, Betico, cu 24 aña, a drenta enlace matrimonial cu señora Glenda Croes di cua matrimonio a sali 4 yiu, Guisette, Glenbert, Junior y Glendeline. Yiunan, cu na un tempran edad, a biba sacrificio di nan tata pa su pueblo. Betico a sacrifica su famia, su yiunan pa e por traha pa e pueblo di Aruba. Palabranan inolvidabel cu Betico Croes a uza, di Omar Torijos di Panama, ta duna honor na e sacrificio aki: “E felicidad cu mi ta desea pa mi propio yiunan, ta e felicidad cu mi ta desea pa henter e pueblo di Aruba”.
Na 1967, Betico a drenta e arena politico riba lista di AVP. Como politico hoben, Betico a bin cu cambionan den politica. E tawata posee un deseo grandi pa uni e pueblo y pa Aruba haya su autonomia. Betico a fungi como diputado pa algun aña y a bandona e partido AVP despues di a wordo inspira pa funda su propio partido.
Dia 9 di februari1971, Betico a funda Movimiento Electoral di Pueblo MEP y su popularidad den pueblo a crece mas y su lucha a bira mas ferviente pa lucha pa realisa e causa di su pueblo. Betico a bira e lider mas stima di Aruba.
Pakico su pueblo ta stim’e?
Betico tawata amigo di pueblo, hende di tur hende. Su lucha pa logra libertad di nos pueblo tawata incansabel. Betico Croes tawata un luchador pa su pueblo. Y ta su noblesa pa realisa libertad di nos pueblo, awe ta haci cu Aruba ta stima Betico Croes.
Den nomber di Gobierno di Aruba, Prome Minister Evelyn Wever-Croes ta invita comunidad di Aruba pa asisti na Manifestacion Cultural diaranson 24 di januari, 8or pa 10.30 anochi na Plaza Libertador GF Betico Croes y pa Ceremonia Protocolar diahuebs 25 di januari, 9or pa 10.30 di mainta na Plaza Libertador GF Betico Croes. Tambe lo tin diferente actividadnan den barionan di Aruba. Pabien Aruba cu Dia di Betico. “Ban celebra e dia aki na grandi. Disfruta di nos programa dedica na e pueblo pa hunto nos recorda e lucha di Betico.”
