Prome Minister Evelyn Wever-Croes: Señor Esteban Banchi Koolman ta ricibi reconocimento pa su aporte pa sostene y promove nos musica cultural

Durante e di tres ‘Fiesta Tipico den Bario’ organisa pa e Fundacion Union di Tipiconan Rubiano, Fundacion UTR, diadomingo 28 di mei Prome Minister Evelyn Wever-Croes, tawatin e honor pa, den nomber di Minister di Cultura Xiomara Maduro, reconoce dos musico pa nan contribucion pa mantene y promove nos musica cultural, señora Mathilde Paskel-Boekhoudt y señor Esteban Banchi Koolman.

Señor Esteban “Banchi” Koolman, Savanetero di nacemento y di curason, a nace dia 26 di december 1941 y ta di Yara. Actualmente Banchi tin e bunita edad di 81 aña. Ora cu Banchi tabata tin 5 aña el’a a cuminsa toca tambu den paranda di mucha hunto cu su ruman Chomai cu tawata toca sonfonia di boca. Shaki Thijsen tawata canta y Robby Thijsen tabata riba wiri. Cu su 16 aña Banchi a forma parti di Quinteto San Luis, tocando Merengue, Wals, Tumba, entre otro instrument, na fiesta di famia y hopi casamento den añanan ‘50. Despues Banchi a toca pa Voces Tucuceros, un grupo di aguinaldo den añanan ’60 y tawata pasa paranda casi tur aña. El’a forma parti tambe di Conhunto Los Sonoramicos. 

Banchi a lanta y dirigi Tipico Yara, Conhunto Estrella Original y Conhunto Estrella de Oro. Por ultimo Banchi a lanta ‘Salsa y Sabor’, e conhunto cu a haci furor pa hopi aña aki na Aruba, specialmente cu nan cancion “Pushi Preto”. 

Den tur grupo y conhunto cu Banchi a toca, “Cuero” ta su instrument preferi aunke cu e por domina diferente otro instrument. Tambe Banchi tawata e cantante estelar. 

Banchi su palabranan semper ta: “Aunke mi por domina diferente instrument, mas importante pa mi ta pa tene nos cultura bibo, especialmente nos Dande”. Manera tambe ta e lema di nos Minister di Cultura Xiomara Maduro, “Cultura Bo tin cu Bib’e”.

Esteban Banchi Koolman tin diferente hobby cu el a practica manera futbol, piscamento, biljart, wega di dam, ping pong y bowling.

Prome Minsiter, den nomber di Minister Xiomara Maduro, Gobierno di Aruba y di pueblo di Aruba ta gradici señor Esteban Banchi Koolman pa su aporte pa sostene y promove nos musica Tipico di Aruba.