Diabierna Prome Minister Evelyn Wever-Croes a participa na e cumbre virtual, Energy Summit III. E cumbre aki ta e ultimo stap den preparacion di e maneho nacional di Energia, nos National Energy Policy, pa despues por formalisa esaki den Conseho di Minister.
Gobierno di Aruba, desde cu e sinta, a cuminsa recalibra su maneho di energia. Gobierno ta desea di haci esaki den forma transparente y den cooperacion cu e “stakeholders” di mas importante. E proceso aki a cana e ultimo dos aña den diferente plataforma y cumbre:
- A presenta nos plannan di energia na IMF na 2019.
- Tabata tin un comision di energia pa nos Plan Strategico Nacional (NSP) na 2019;
- Tabata tin dos cumbre di energia na 2019 (Energy Summit I & II na unda a delinea e puntonan principal di e maneho);
- Tabata tin un comision di siguridad di energia e aña aki pa e Masterplan “Repositioning our Sails”;
- Y tabata tin un “National Energy Policy Review” di september pa november di eaaña aki unda a ricibi comentarionan balioso riba e nota di maneho.
Den e cumbre di diabierna, a afirma e metanan energetico (“energy goals”) cu a stipula den e maneho nacional di Energia.
E direcion cu Gobierno ta duna pa e “energy policy” ta cu ta buscando un maneho balansa. Un maneho unda ta pone e ser humano central, unda ta aporta na nos economia y unda ta aporta na medio ambiente y mitigacion di cambio di clima.
Den esaki pa Gobierno, un di e punto di mas importante ta cu e metanan energetico mester ta realistico y responsabel. Esaki tin di haber cu e sector di energia ta asina importante. E ta un sector cu no por hunga cu ne. Energia, y e awa cu e sector ta produci, ta nescesidanan basico. E sector di energia tambe ta un sector vital, un infrastructura critico, cu ta afecta e funcionamento di nos economia y nos sociedad. Pesei Gobierno kier pa e maneho pa e sector aki ta uno responsabel.
Esaki no kiermeen cu no tin ambicion. No, e metanan energetico cu nos ta propone awe ta aliña Aruba cu e metanan internacional pa combati cambio climatologico y cu e Acuerdo di Paris. Pa cumpli cu esaki lo tin cu baha e emisionan cu 45% prome cu 2030 y, pa esey, yega na un nivel di 50% energia renobabel prome cu 2030. Pa esaki ta trahando riba e terenonan necesario den cuadro di ROP y ROPV.
No obstante, semper por studia si un ambicion mas halto ta factibel. Esaki kiermeen cu despues cu a aproba e maneho nacional di energia lo tin mas estudio pa determina si por hisa ambicion. Si esaki resulta factibel den un forma responsabel, lo nos ahusta nos metanan energetico na nivel di Gobierno tambe.
Den e cumbre, Prome Minister na final a dedica un palabra na nos refineria.
“E refineria aki ta masha importante pa nos economia. Hopi hende ta puntra con un refineria ta pas den un vision di energia limpi. Locual nos ta buscando awor ta pa tin un re-apertura di e refineria unda cu e impacto ambiental ta wordo minimalisa. Pues, pa e refineria wordo opera cu fuel mas limpi manera LNG of energia renobabel. Asina nos ta aspira pa tin desaroyo economico den harmonia cu medio ambiente”.
Prome Minister a gradici tur participante pa tur contribuccion, di un forma of otro, cu nan a duna na e proceso aki y haci posibel pa Gobierno por tuma e pasonan nescesario pa formalisa e maneho nacional di Energia den Conseho di Minister.
