ORANJESTAD,Aruba
Cu e proyecto aki lo reconoce San Nicolas su identidad y balor historico.
Diahuebs ultimo Prome Minister Evelyn Wever-Croes a atende e apertura di B-Lab San Nicolas. Despues cu na 2018 B-Lab a habri na Biblioteca Nacional di Playa, esfuersonan a sigui mesora pa expande e concepto y habri mas Labs den diferente districto.
B-Lab San Nicolas ta un localidad unda cu tur hende por tin acceso na ‘Digital Fabrication Tools’ y tambe recursonan pa sigui desaroya nan habilidad y interes den por ehempel ‘prototyping’, ‘programming’, y ‘Robotics’. Hopi di e conceptonan aki ya caba a wordo introduci na B-Lab na playa y den e proyecto di Mo-B Lab cu awor ta den su segundo aña di operacion. B-Lab San Nicolas tin como meta pa no solamente replica e servicionan cu B-Lab Playa ta ofrece pero tambe desaroya un caracter di su mes, reconociendo San Nicolas su identidad y balor historico.
E proyecto aki ta un iniciativa di Metabolic Foundation, Biblioteca Nacional Aruba, UNOCA, y tambe Futura. Gobierno di Aruba kier a felicita y alabes gradici e grupo aki, especialmente Metabolic Foundation y Biblioteca Nacional Aruba, pa nan vision y dedicacion! Cu esaki, 2020 – e aña di innovacion y educacion – ta cuminsa cu un tremendo iniciativa.
