Diaranson Parlamento di Aruba a trata ley di Veiligheidsdienst Aruba (VDA). E departamento aki tin un tarea basa den ley pa traha cu instancianan y institutonan local y internacional pa por acumula informacion pa e departamento por calcula menasanan cu ta haya como Pais y pa limita of aumenta e resistencia pa loke ta trata e siguridad nacional di Pais Aruba. Y den cuadro di e ley aki, ta traha riba mas transparencia, ta mehora e forma con e departamento ta eherce su trabou y ta bin tambe mehoracion di funcionamento di e comision di supervision/ ‘commissie van toezicht’, Premier Evelyn Wever – Croes a splica.
Parlamentario Edgard Vrolijk durante su discurso den Parlamento a amplia riba e tema di integridad y na mes momento a dirigi pregunta na prome Minister Evelyn Wever – Croes, expresando su preocupacion riba e tema aki. Specificamente e hecho cu mester por garantisa un Presidente di Parlamento integro, pa cual a haci e pregunta pa introduci exigencia di screening. Esaki teniendo na cuenta cu Parlamento ta e organo di mas halto na Aruba y tambe e casonan di ex Minister y/of Parlamentario bou di investigacion.
Premier Wever – Croes a reaciona splicando cu na e momentonan aki e preocupacion di sr. Vrolijk ta algo cu como Gobierno mester bay wordo evalua, pa mira si realmente ta e deseo pa bin cu un exigencia di screening di un posicion di Presidente di Parlamento, Vice Presidente di Parlamento of Parlamentario.
‘Nos derecho constitucional di scoge nos representatenan di pueblo no por wordo limita y mi ta kere cu nos tur aki ta di acuerdo cu no kier limita esey. Pueblo tin e derecho pa scoge su representatenan.
Te ainda a demostra como Pais den bon tempo y mal tempo cu esaki no ta algo cu ta haci wega cu ne, dus mi no ta kere necesariamente cu aworaki tin un problema hopi urgente. Ohala ta trece e ley di integridad bek Parlamento y e ora por sigui debati riba e punto aki, Premier Wever – Croes a duna di conoce.
Pa resumi, teniendo cuenta cu e preocupacion treci dilanti di Parlamentario Vrolijk, Prome Minister a pidi poco tempo pa por consulta riba e tema y mira kico ta e miho paso pa tuma, prome cu bay na sea inclui un exigencia di screening, of pa bay na otro proposicionnan treci dilanti.
Premier Wever – Croes a termina bisando cu Veiligheidsdienst ta un instituto clave den nos comunidad y cual Aruba por ta hopi orguyoso di dje. Ta gradici tur esnan cu a traha riba e ley manera Directie Wetgeving en Juridische Zaken (DWJZ), Veiligheidsdienst Aruba y coleganan Minister. E mandatario principal di nos pais a gradici Parlamento di Aruba pa aproba e ley unanimamente.
