ORANJESTAD,Aruba
Dialuna mainta den conferencia di prensa di Gobierno di Aruba Premier Evelyn Wever-Croes a elabora riba e condicionnan cu Hulanda ta pone na e siguiente tranche di fiansa. Ta trata di e peticion di Aruba na Hulanda pa fiansa pa juli, augustus y september. Hulanda a manda 218 pagina di documento secreto, cu no por comparti ni publica, 18 condicion y Aruba tin 4 dia pa tuma decision.
Premier Wever-Croes a remarca cu e forma di proceder aki ta totalmente ekiboca y ta bay contra e reglanan di transparencia cu Hulanda mes ta promove. E simple hecho cu ta duna apenas 4 dia pa studia e proposicion cu ta bay hopi leu, sin cu por ta transparente den e proceso, ta causando hopi discusion na Aruba.
Hasta tin oponente politico cu ta tilda Premier Wever-Croes di ta gaña, siendo cu reglamento di orden di Conseho di Minister di Reino mes ta stipula e secrecia di documentonan y ta lamenta cu Parlamentarionan di oposicion no conoce e reglanan aki.
Gobierno di Aruba a protesta caba na Hulanda contra e forma cu nan kier impone e cambionan aki contra tur regla di transparencia y bon gobernacion.
“Apesar cu e forma di proceder di Hulanda no ta na su luga, no ban permiti Hulanda stroba nos lanta nos pais bek. Ta un siman crucial pa desaroyo pa nos pais. Cu optimismo y fe nos lo logra” Premier Evelyn Wever-Croes a finalisa bisando.
