Den cuadro di Dia Di Betico,
“Mi ta sumamente satisfecho pa wak con bon prepara e dos klas 5 nan aki ta y cuanto informacion nan tin di e dia importante aki”
Den cuadro di celebracion di Dia di Betico, Prome Minister Evelyn Wever-Croes a bishita Reina Beatrix School klas 5, pa mira con e muchanan ta prepara pa e dia importante aki. Prome Minister a expresa di ta sumamente satisfecho pa wak con bon prepara e dos klas 5 nan aki ta, y cuanto informacion nan tin di e dia importante aki.
Durante su bishita, e muchanan di klas 5 a duna Prome Minister un presentacion riba e bida di Betico, y despues a combersa riba diferente aspecto, y a haci hopi pregunta cu Prome Minister a contesta. Na final di su bishita, Prome Minister a despedi lagando e muchanan cu un mensahe importante; El a bisa nan cu semper nan mester corda ken Betico ta y tur loke el a haci pa Aruba, y cu den cada un di nan tin un Betico scondi. Prome Minister a splicanan cu tempo, nos Libertador, Betico Croes tabata chikito, e tabata mescos cu nan, e tabata gusta haci deporte, y tabata tin un pasion pa musica, pero mas importante e tabata tin un amor grandi pa su pais, Aruba. “Mi ta sigur cu cada un di e muchanan aki tin un Betico den nan, y ta importante pa nan purba na desaroya e caracteristicanan aki, pa asina por hiba pais Aruba dilanti,” Prome Minister a expresa.
Prome Minister ta gradici e cabesante di Reina Beatrix School, señora Rosalinda Granger y tur otro docente pa nan dedicacion y trabou duro pa cu futuro di nos muchanan.
