Nos ta drentando fin di e Siman Santo. Na Aruba, mayoria ciudadano e dianan aki ta tuma tempo pa pasa cu nan famia sea pa biaha, campa of keda cas y disfruta di union familiar. Esaki pa hopi ciudadano tambe ta wordo considera un temporada solemne y importante pa renoba nan fe y reflexiona riba Hesus. Prome Minister Evelyn Wever-Croes desde Hulanda, ta desea pueblo di Aruba un temporada bunita y sigur.
“Mi ta spera cu henter Aruba por tin un fin di siman di debocion. Nos ta un comunidad cu un fe grandi y den e dianan aki ta bon pa nos para keto y refleciona riba e bida y morto di Hesus. Su sacrificionan cu el a haci pa amor pa otronan.
Ohala cu esey por inspira nos tambe den e lucha cu nos cada un ta hiba cada dia. Nos mes, nos famia, nos pais, pasobra e fe lo yuda cada un di nos pa logra tur nos metanan. Ohala e fin di siman aki ta yena cu debocion, y mi ta spera cu esnan cu tin e tradicion di bay campa, tene cuente cu mester cuida nos beachnan. Aruba a caba di wotdo renombra pa tin e playanan mas bunita di Caribe y di mundo. Esaki nos a logra hunto y ta hunto nos tin cu mantene nan asina tambe. Un feliz siman y Pasco di Resureccion.
