Un era nobo ta bay cuminsa pa San Nicolas
Minister President Evelyn Wever-Croes a reuni cu desaroyadornan di hotel Secrets na San Nicolas. Desaroyadornan tabata tin e bon noticia cu nan ta trahando pa keda cla cu e prome fase di e hotel pa fin di e aña aki, 2024. Un total di 300 camber ta habri fin di 2024 y e demas cambernan ta wordo construi den fase 2 cu 300 camber na 2026, y den fase 3 cu 300 camber mas na 2028.
Esaki ta un noticia hopi positivo pa San Nicolas y pa Aruba. E hotel aki lo ta e prome hotel grandi pa San Nicolas y cu lo genera un desaroyo grandi pa San Nicolas y pa esnan cu ta biba pariba di burg. “Esey tabata nos compromiso cu San Nicolas, pa trece bida bek den San Nicolas, y nos ta logrando”, Minister President Evelyn Wever-Croes a accentua.
UN ERA NOBO PA SAN NICOLAS
Pa Gabinete Wever-Croes II, desaroyo di San Nicolas ta un prioridad y p’esey ta traha duro pa logra yega na un solucion pa cu e proyecto aki. Prome Minister a indica cu pa Gobierno e proyecto aki ta uno di gran beneficio mirando cu e lo crea oportunidad laboral y un crecemento economico pa Aruba na San Nicolas y vecindario. Tambe, Gobierno ta invertiendo hopi placa den embeyecemento di diferente area incluyendo Baby Beach y Rodgers Beach.
Un otro desaroyo importante pa San Nicolas ta e World War II Memorial cu lo ta na Seroe Colorado y cu lo atrae hopi bishitante pa e parti aki di nos isla, combina cu un bishita den centro di San Nicolas. E proyecto aki lo keda cla na mita di e aña aki.
Tambe tin e trabounan den Mainstreet San Nicolas, cu lo cuminsa e prome kwartaal di 2024. Y e esfuersonan cu ministernan di Economia y Naturalesa ta haciendo pa trece un desaroyo den centro di San Nicolas. Tur esakinan ta un muestra di e compromiso cu Gobierno tin cu Aruba y principalmente cu e habitantenan di San Nicolas.
SAN NICOLAS BUSINESS ASSOCIATION
Gobierno tin un bon colaboracion cu San Nicolas Business Association pa realisa e proyectonan aki y mas proyecto cu SNBA ta acelerando pa realisa pronto.
“Nos ta convensi cu e tipo di desaroyo aki tin hopi potencial y oportunidad di crecemento pa Aruba y San Nicolas. Pa e motibo aki, lo sigui lucha pa logra na haci tur e proyectonan aki un realidad. Esaki ta nos compromiso cu Aruba y San Nicolas”, Prome Minister a expresa.
