Prome Minister Evelyn Wever-Croes: Gobierno di Aruba a entrega e landsbesluit na tur empleado di korrectie Instituut Aruba (KIA)

Diahuebs mainta na Hyatt Place a tuma luga e clausura di e re-organisacion di KIA. Prome Minister Evelyn Wever-Croes hunto cu Minister Rocco Tjon tabata presente na e gran evento aki na unda a entrega e lansbesluit na tur e 170 personal di Korrectie Instituut Aruba (KIA). E reorganisacion aki a cuminsa na aña 2009 y awe, 13 aña despues a logra finalis’e. Esaki sigur no lo tabata posibel sin e determinacion di e actual Minister di Husticia Rocco Tjon cu hunto cu e team di trahadonan, Directiva di KIA, sindicatonan y Departamento di Recurso Humano a dedica na finalisa e proyecto aki. “Esaki ta otro muestra cu union ta e forsa pa logra cosnan grandi”, Prome Minister a expresa. 

Tambe, Prome Minister, den nomber di Gobierno di Aruba a sigura e trahadonan cu nan no a wordo lubida, y cu Gobierno ta trahando duro na purba yega na un solucion pa cu e instituto importante aki. 

“Mi kier gradici Departamento di Recurso Humano, sindicatonan, ex Minister di Husticia Andin Bikker cu a cuminsa cu e proyecto aki durante pandemia, Minister Rocco Tjon cu a finalisa e proyecto, y tur empleado pa nan determinacion y dedicacion pa cu esaki. E no ta facil, pero ora tin union, por logra cosnan grandi pa Aruba. Masha pabien na tur empleado cu e promocion y reorganisacion aki y cu Dios sigui guia boso den e trabou grandi cu boso ta bin ta hacienda,” Prome Minister a expresa.