Problema ta e compromisonan cu Gobierno di AVP a haci
Prome Minister Evelyn Wever-Croes, riba comentarionan recien den media tocante “NO MORE HOTELS”, a indica cu e tereno di e hotel cu ta actualmente den construccion na Eagle Beach di IBERO, a wordo otorga desde 2005-2008. Iberostar, cu a bira doño di dos otro proyecto cu tereno, a tuma over e proyecto na Eagle Beach, y ta finalisando construccion.
Iberostar, Prome Minister a remarca, ta un caso hopi particular, mirando cu nan a cumpra tres proyecto di hotel, cu ya caba tawata tin tereno desde 2005 pa 2008 bin dilanti. Un tereno ta situa na Tierra del Sol, un patras di Eagle Beach, y un na Eagle Beach unda actualmente e costruccion ta tumando luga.
IBEROSTAR SEMPER DISPUESTO PA SINTA NA MESA
Prome Minister a duna di conoce cu despues cu Gobierno a splica Iberostar cu Aruba no por carga tres hotel pareu, nan semper tawata dispuesto pa sinta na mesa pa negocia. Teniendo na cuenta e preocupacion di Gobierno pa cu esaki, nan a bay di acuerdo pa baha e cantidad di cambernan y construi menos camber di loke nan tin derecho riba dje. Tambe, nan a bay di acuerdo pa no construi tur tres hotel pareu, pero pa construi esakinan den diferente etapa.
Gabinete Wever-Croes a hereda mas di 7000 camber di e gobierno anterior, y a logra negocia pa baha e cantidad te na 1,200. Esaki sigur ta un logro grandi di e Gabinete actual, aunke cu e cantidad aki ta uno grandi ainda pa un isla chikito manera Aruba.
