Ta hopi importante pa nos baha e cantidad di casonan activo na Aruba pa asina nos por bay bek na e normalidad nobo. Durante e reunion den Parlamento dialuna pa duna un update di e maneho di Covid, Prome Minister Evelyn Wever-Croes a
Turismo den e prome dos lunanan despues cu nos a habri frontera, juli y augustus, a bay hopi bon. Casi 13 mil na juli y 17 mil na augustus. Pa september – cu semper ta mas slow cu juli y augustus – nos ta kere cu lo ta 15 mil. Apesar cu e cantidadnan aki no ta compara na e 80 mil turista cu average nos tawata ricibi mensual, ta trata aki di 13 mil, 17 mil y 15 mil, total 45 mil persona cu a laga nan pais y a scoge Aruba pa bin bishita y relaha. Nos tur por mira con positivo nan experiencia tawata den nan expresionnan haci.
“Esaki ta danki na e cordialidad di nos hendenan den sector di horeca, cu apesar di tur cos, y tur e riesgo cu nan trabou ta trece cu ne, ta duna tur cu nan por pa e tursita ta satisfecho. Mi ta garantisa e trahadonan den e sector aki, cu nos ta trahando pa sigura nan salud y bienestar mas tanto posibel.
Kico e tendencia aki ta bisa bo?
Esaki ta bisa nos cu nos turistanan kier bin Aruba. Cu apesar di tur e exigencia di test, seguro, tapaboca, higiena, y distanciamento, nan ta sigui dispuesto pa bin Aruba. Locual ta strobando nos di habri pa mas turista, no ta cu e turista no kier bin, pero ta cu nos mester baha e cantidad di casonan activo.
Si nos baha e cantidad di caso activo nos por ricibi mas turista, y nos por cuminsa mira hopi mas actividad economico di turismo. Mientras tanto nos kier mehora e bunitesa di nos pais pa ora nos turistanan bolbe, nan por goza mas aun di nos naturalesa.
Aparte di turismo tin hopi interes di inversionistanan local y internacional pa inverti den Aruba. Tin desaroyo riba tereno di infrastructura. Tambe tin e destaho publico pa e refineria. Tin 10 compania cu a sigui pa e di dos tanda di e REOI-1 pa un refineria, y 7 compania cu a sigui pa e di dos tanda di REOI-2, cu ta un desaroyo pa San Nicolas, los di e refineria.
Awor nan ta den e fase di haci site visits y pa nan duna un binding offer, y pa november nos lo haya sa cua ta e inversionista of inversionistanan cu ta bay yuda nos reactiva nos economia.
Tambe tin e pilar economico di cannabis, cu apesar cu nos a encontra hopi contra tiempo, pa nos por haci’e bon y corecto, e ta uno prometedor pa Aruba cu lo wordo concretisa pronto. E ley mes ta den e proceso pa yega na Parlamento y asina cu e cuadro legal ta bon regla, nos por continua cu desaroya e pilar aki.
Nos ta den e corona crisis ainda, y nos tin retonan grandi nos dilanti ainda, pero tambe nos por mira resultadonan positivo. Di awor en adelante laga nos tuma e resultado positivo aki como motivacion pa hunto sigui cumpli cu diciplina e reglanan di higiena y distanciamento social unda cu nos bay. Pasobra ta solamente manteniendo di cantidad di casonan di contagio di e virus bao di control y abao, nos por recupera Aruba su economia y futuro.
Nos hendenan ta fuerte, nos hendenan tin curashi, y principalmente nos hendenan ta balente. Mi tin tur confiansa cu e biaha aki nos lo ta exitoso un biaha mas. Disciplina y cordialidad lo ta e yabi di nos exito”, Prome Minister Evelyn Wever-Croes a expresa.
