“Tabata tin un tarea dificil pa scoge 30 ganado den 1222 pintura”
Diahuebs 19 di October, a tuma luga na Bestuurskantoor entrega di premionan pa e concurso di pintamento 2023. E concurso aki a wordo organisa e aña aki pa di 5 aña consecutivo cu e meta pa conscientisa comunidad, specialmente nos muchanan, riba e importancia di cuida nan mascotanan.
E aña aki, Minister di Enseñansa Endy Croes a organisa e concurso aki pa nos muchanan di scol. Un total di 1222 mucha a participa e aña aki mustrando asina e amor grandi cu cada mucha tin pa nan mascotanan. A saca 30 ganado, 5 finalista di cada klas di scol basico cu a particpa. Ganadonan a ricibi un certificado y un regalito.
E concurso ta basa riba e Ley di Cacho. Cacho mester ta den cura y no riba caya. Un ley cu ta preveni pa cacho bira molester pa nos comunidad, pero tambe cu ta obliga e persona cu tin un cacho na e cuido minimo cu e responsabilidad aki ta trece cu ne. E concurso di pintamento ta yuda trece conscientisacion riba esaki, cuminsando cu nos muchanan di scol basico.
“E muchanan aki ta mustra a traves di nan pintura cu nan ta stima nan cacho. Un mucha durante e encuentro bunita aki, a comparti su experencia y ta pidi pa tur hende cu tin cacho, pa nan tene nan cacho den cura. El a conta su storia cu su cacho a wordo ataca pa un cacho di caya cu a laga su cacho hopi malo y ainda ta recuperando, pero a keda e sentimentonan cu esaki a trece cu ne. Como adulto, nos por tene cuenta cu e storianan chikito aki cu nos muchanan ta siña nos. Cacho mester ta den cura y awe nos ta cera otro campaña di conscientisacion di Ley di Cacho”, Prome Minister a expresa.
Na prome luga, Prome Minister ta gradici tur e ganadonan pa nan tempo y dedicacion pa participa na e concurso aki, na mayornan, adultonan y docentenan cu ta stimula e muchanan no solamente cu pintamento y arte pero tambe pa e amor na nan mascotanan.
Prome Minister ta gradici Minister Tjon y Minister Croes cu tambe a yuda cu e regalitonan y demas coleganan minister. Un gradicimento na tur scol cu a participa. Como Minister di Husticia, Minister Tjon ta percura pa Polis keda controla y tuma accion na momento cu tin violacion di Ley di Cacho. Minister Croes ta haciendo esfuerso pa esaki drenta curriculum di scol y haci’e structural na unda muchanan ta siña di derecho y debernan cu tin pa cu cacho. Minister Ursell Arends ta trahando riba e plan nacional pa asina percura cu no lo tin molester di cacho riba caya mas. Prome Minister ta gradici tambe Irene Croes cu como veterinario a cuminsa cu e plan nacional na aña 2019 y a entrega esaki na Minister Arends na aña 2021, pero nunca a laga un banda e inspiracion cu e concurso aki a demostra desde su prome aña na 2019, y cu semper a traha incansablemente pa e concurso su exito sigui crece.
“Esaki ta un tema cu tin prioridad di Gabinete Wever-Croes y ta mas cu un honor pa mi cu pa 5 aña Gobierno ta entrega premio cu e campaña di conscientisacion di Ley di Cacho aki. Entrante otro aña esaki lo drenta scolnan na Aruba cu ta un meta di nos Gabinete desde comienso. Mi ta hopi contento di mira con Aruba a avansa y con hopi amor tin na Aruba pa nos mascotanan”, Prome Minister Evelyn Wever-Croes a duna di conoce.
