ORANJESTAD, Aruba
Prome Minister Evelyn Wever-Croes a duna un reflexion lagando atras e sentimento cu e crisis aki tambe lo ta exitoso si nos tin curashi, determinacion y amor pa nos pais.
“Kico nos a scucha awe tocante Covid-19? Nos a scucha cu Aruba tin un maneho hopi mas estricto cu otro paisnan den cercania. Nos tin un maneho extra estricto pa nos bishitantenan y asina mes nan ta scoge pa Aruba. Nan por scoge pa otro destinacion caminda tin menos exigencia, na unda no tin seguro ni ta exigi pa haci e test ni aya ni aki y toch nan ta scoge pa Aruba. Esaki ta algo cu nos ta aprecia hopi y ohala nos por mustra nan e aprecio ey den e cordialidad cu semper nos ta conoci p’e.
Nos a siña awe cu nos a haña tambe mas cu 10 mil persona ta bishita nos desde prome di juli ora nos a habri nos fronteranan. Di e 10 mil personanan aki 14 persona ta positivo. Si nos limita nos mes na turistanan nos por wak cu tin mas di 7 mil turista cu a bin y 7 di nan so a test positivo. E demas turistanan ta gozando riba nos isla y invertiendo y contribuyendo na nos economia.
Kico tambe nos a siña awe? Nos a siña cu anochi mas laat nos tin mas riesgo di contagio. No pasobra cu e virus ta bira mas activo anochi laat, sino cu nos tin e tendencia di ta mas iresponsabel anochi despues di 11 pm, cu ta e orario di ciere.
Nos a scucha cu despues di 11or di anochi cu drinks den curpa hendenan tin tendencia di yega mas cerca di otro y no ta respeta e distanciamento cu mester tin.
Nos a scucha tambe cu a consecuencia di oranan laat y alcohol tin mas accident ta pasa y ta tuma luganan hopi critico y crucial den nos Hospital.
Pa nos logra vence e crisis aki ta nos tur mester cera hunto y bringa esaki. Nos a haci’e den pasado, nos a yega di bringa hopi reto cu a enfrenta nos pais. Esaki tambe ta un cu nos por enfrenta. Nos lo enfrent’e cu mesun cordialidad di semper y cu disciplina. E dsiciplina di sigui e reglanan di higiene, laba man frecuentemente cu habon, tene distancia di 1.5 meter di otro personanan. Y si pa bo mala suerte bo pega cu virus, talves e no lo haci bo nada pasobra bo ta fuerte. Pero bo ta bay cas y pega otronan talves mas vulnerabel. Si bo ta sinti un sintoma keda paden y yama bo dokter pa bo haci e test di Covid-19.
Esaki ta e unico cu nos ta pidi cada ciudadano di nos pais. Mi no ta kere esaki ta hopi pidi. Aruba ta enfrentando retonan grandi pero nos como Arubiano semper a demostra curashi, determinacion y amor pa nos pais. Mi ta sigur cu e biaha aki tambe nos ta bay ta exitoso”.