Gobierno di Aruba desde inicio di gobernacion a tuma pasonan importante pa purba frena abuso di menor y a implementa varios programa y reforma riba e tereno aki. Na e momento cu Gabinete Wever-Croes a cuminsa goberna, mesora a nota un negligencia grandi riba e veld social pa cua motibo tambe mesora a cuminsa traha riba e Social Crisis Plan.
Prome Minsiter Evelyn Wever-Croes a duna di conoce cu ya caba desde cu e tabata den oposicion den Parlamento na aña 2010, a cuminsa traha riba e proposicion di ley di iniciativa den casonan di abuso di menor y a reuni cu stakeholders. Ora cu Gabinete Wever-Croes a sinta na aña 2017 a encontra hopi reto financiero pero no obstante di esaki a logra aloca fondonan necesario pa instala e Sociaal Crisis Plan despues di e casonan severo cu a tuma luga den e sector social. E prioridad a wordo poni riba e ser humano en especial riba nos mucha-y hobennan.
Pa medio di e Sociaal Crisis Plan cu ta trahando den e sectornan Social, Husticia, Salubridad Publico y Enseñansa a bin cu hopi cambio, reforma y proyectonan pa combati e retonan severo riba e tematica di abuso di menor.
Ministerio di Asuntonan General cu ta cay bou di Prome Minister, a constitui un Comision Nacional contra Abuso Sexual di Mucha pa haci investigacion specifico y entrevistanan cu stakeholders pa mehora e sistema nacional di proteccion di mucha.
Cu Vision & Meta Strategico Gabinete Wever-Croes a traha pa Felicidad y proteccion di nos muchanan.
- A institui un Comision Nacional di Abuso di Menor.
- A aproba Ley di aumento di castigo (juli 2020 – AB 2020 No. 100).
- A aumenta strafnan den casonan di abuso di menor (zedendelicten).
- A ahusta Verjaringstermijn.
- A desaroya diferente ley y Codigo di Proteccion pa proteha y duna siguridad: ley di creche, ley di proteccion di mucha y hoben, ouderplan.
- A institui Departamento pa Mucha y Hoben na 2021 pa sigura cu e leynan di mucha ta • wordo aplica.
- A inaugura Centro pa hoben y famia na 2020 pa yuda mayornan fortalece nan parenting skills.
- A realisa diferenta charla tocante e tema di abuso di menor.
- A introduci FACT-Team, Kind en Jeugd di Sociaal Psychiatrische Dienst.
- A expande e “crisisopvangplekken” na Fundacion Contra Violencia Relacional (FCVR).
- Bureau Sostenemi a bira Advies en Meldpunt Kindermishandeling (AMK) na 2019.
- Curso di “Sign of Safety” den e sectornan social, enseñansa, salud publico y husticia pa crea siguridad pa e mucha unda cu e ta.
- A percura pa expande servicionan door di tuma mas psicologo, psikiatra y otro profesionalnan den servicio.
- Stichting Reclassering en Jeugdbescherming a logra establece su departamento di Jeugdreclassering.
“E problematica aki no ta facil sino mas bien hopi delicado. Sinemargo nos mester para keto na un punto hopi crucial. Esaki ta prioridad number un desde di inicio di gobernacion di Gabinete Wever-Croes I y ta keda e prioridad number un tur dia pa Gabinete Wever-Croes II, pa percura pa nos muchanan wordo protehi. Abuso sexual di menor ta dal nos tur hopi duro den nos curason. Mi ta pidi sosten di cada ciudadano pa hunto yuda cuida nos muchanan. Gobierno di su parti ta haciendo y lo keda haci tur loke por pero ta depende di cada un di nos ciudadanonan pa yuda den esaki”, Prome Minister Evelyn Wever-Croes a duna di conoce.