En conexion cu luna di Conscientisacion y Prevencion di Abuso di Mucha
Pa fortifica e compromiso di Gobierno cu cada mucha riba nos pais
Diabierna 21 di april, Conseho di Minister a bisti blauw como simbolo di sosten na cada mucha di nos pais. Esaki en conexion cu e luna di Conscientisacion y Prevencion di Abuso di Mucha. Gabiente Wever-Croes desde cu a drenta gobernacion na aña 2017, a pone nos muchanan como prioridad den su maneho. Y hunto cu instancianan concerni a hiba un maneho poniendo nos muchanan realmente central.
Gobierno di Aruba, pa mustra no solamente sosten na Conscientisacion y Prevencion di Abuso di Mucha, pero tambe pa fortifica e compromiso di Gobierno cu cada mucha riba nos pais, ta uni su mes na e luna di conscientisacion y prevencion pa asina yuda comprension di cada mayor, di cada ciudadano di nos pais, pa hunto nos por crea experencianan positivo pa nos muchanan.
Diabierna, Conseho di Minister a bisti blauw pa mustra sosten na e conscientisacion mundial y tambe pa duna cada mayor e siguransa cu Gabinete Wever-Croes tin nos muchanan como prioridad den su maneho. “Como ciudadanonan di nos pais, ta obligacion di cada un di nos cuida y protehe nos muchanan. Esaki no ta deber di nos muchanan. Y door di no ignora y no neglisha derecho di cada mucha, nos ta brinda un miho futuro pa nos muchanan. Hunto nos mester para tur abuso fisico, emocional y sexual pasobra tur mucha tin e derecho humano pa biba liber di e mal experiencianan aki. E bienestar y salud di nos Aruba y di mundo henter, ta depende riba e siguridad y proteccion cu hunto nos ta brinda nos muchanan”, Prome Minsiter Evelyn Wever-Croes a enfatisa.