Siguiendo cu su bishitanan na scolnan basico, diabierna 19 di januari, Prome Minister Evelyn Wever-Croes a pasa cerca e alumnonan di Cacique Macuarima School klas 5.
E muchanan di e dos klasnan 5 tawata masha contento y cu hopi interes pa celebra Dia di Betico. Den un ambiente masha ameno, Prome Minister a combersa cu nan y a conta nan un tiki di e lucha y logronan di Betico. Aki e muchanan a mustra nan curiosidad y a haci basta pregunta hopi interesante. Tawata momentonan masha agradabel unda e mandatario a tuma opinion di e muchanan riba kico nan lo kier pa inverti den dje.
Prome Minister, desde cu el a drenta Gobierno el a pone enfasis riba e importancia di e fecha 25 di Januari, Dia di Betico, cu esaki no ta solamente un dia liber di scol, sino pa splica e muchanan e significado di e dia aki. Esaki ta e motibo principal di tur su esfuersonan pa sigui bishita scolnan, pa combersa cu e muchanan, conta nan e historia di su omo y padrino Betico, y tambe pa e mes wak con nan ta preparando pa e dia importante aki.
Tur bishita na scolnan ta sigui impresiona Prome Minsiter, e poesianan, presentacionnan y tur e interes cu e muchanan ta mustra a traves di storianan cu nan ta conta nos mandatario. “Nos tur por traha hunto pa hiba nos Pais dilanti, nos tur tin un Betico den nos”, Prome Minister a expresa.
“Nos ta sigui bishita mas scol prome cu Dia di Betico y tambe ora di dia di Himno y Bandera. Asina nos lo sigui otro aña atrobe pasobra pa mi ta hopi importante pa ta aki nan mi mes, pa mira kico e muchanan ta pensa di un persona asina importante manera Betico Croes.”
Reconociendo e gran trabou di cabesante y staff di Cacique Macuarima School, Prome Minister a despidi gradeciendo nan pa a permiti su persona bishita nan un biaha mas y bisando cu semper e scol lo tin un luga special den su curason.
