“Mi ta weita atras riba un bishita hopi exitoso, principalmente e conferencia cu tabata uno super inspirativo”
Prome Minister Evelyn Wever-Croes a duna un resumen di loke tabata e bishita di Secretario di Estado Alexandra van Huffelen na Aruba. Prome Minister a indica cu despues di e conferencia di “Hende Muhenan Fuerte” su persona a reuni cu Secretario di Estado na Bestuurskantoor pa asina por cubri algun tema cu tin pendiente, manera e recorte di salario y e condicionnan cu tin riba mesa.
Recorte salarial
Prome Minister a informa Secretario di Estado cu el a haya un carta di Parlamento indicando e resultado di nan reunion na unda mayoria di e Parlamentarionan a bay di acuerdo pa sigui cu e recorte di 25% di nan salario pa asina pueblo por haya nan 5% bek. Pa loke ta trata e Wever-Croes norm, Parlamento a informa cu nan lo trata e ley aki otro luna. Secretario di Estado ta satisfecho cu tur e informacionnan pa por trata e tema aki den Rijksministerraad.
Situacion di Parkietenbos
Un tema cu Secretario di Estado tambe kier a cubri durante e reunion ta e tema di Parkietenbos. Akinan Minister Ursell Arends cu ta e Minister encarga a informa Secretario di Estado riba e plannan cu tin andando.
Topico di Covid y CFT
Secretario di Estado Alexandra van Huffelen tambe tabata interesa pa cubri e tema di Covid, pa e por tin un idea con prepara Aruba ta. Minister di Salud Dangui Oduber, a duna un splicacion di kico tur Aruba ta haciendo na e momentonan aki. Banda di esaki Secretario di Estado van Huffelen tabata tin cierto pregunta riba e consehonan di CFT cu ultimamente ta birando mas critico, y akinan Minister Xiomara Maduro a duna su splicacion.
Expresionnan di Secretario di Estado van Huffelen di su bishita
Pa locual ta e conferencia unda den cual a introduci e Gender Policy Aruba, van Huffelen a expresa cu e experiencia tabata fantastico y hopi inspirativo. El a keda encanta di por a scucha storianan di diferente lider femenino y cu tabatin e espacio pa dialoga riba kico tur por haci pa yuda otro hende muhenan.
Bishita na Museo Archeologico Nacional di Aruba
Un otro bishita cu a realisa tabata na Museo Archeologico Nacional di Aruba (MANA). Na e occasion, van Huffelen a dialoga cu Prome Minister di Aruba y otro miembronan di Gobierno tocante diferente tema relevante y a bolbe haci acuerdonan pa sigui traha hunto y bay dilanti. Tambe a ricibi un recorido di e museo y un presentacion hopi interesante.
Na final, Prome Minister Wever – Croes a gradici tur esnan cu a yuda pa haci e bishita di Secretario di Estado van Huffelen uno exitoso, y a duna danki na MANA pa e bunita recorido di e museo. “Mi tin cu bisa cu mi ta weita atras riba un bishita hopi exitoso, principalmente e conferencia cu tabata uno super inspirativo. Importante ta pa nos traha riba e confiansa y relacion y cu hopi mas optimismo mi ta mira cu nos ta bay sali di e problemanan cu nos ta den.”
