Diahuebs 3 di februari, den un reunion publico den Parlamento e ley di Landsverordening Instelling Ministerie, LIM a wordo aproba. Den e ley di LIM por mira cu a yega na un reparticion di 8 minister pa Gabinete Wever-Croes II. Prome Minister Evelyn Wever-Croes durante e reunion den Parlamento a splica cu apersar cu ta goberna cu 8 minister, e gastonan a keda igual na 7 minister trahando cu un cantidad limita di personal pa cada bureau di minister.
Mientras cu Aruba a yega di conoce gobiernonan di 7 minister, di 9 minister y e gobierno di AVP te hasta casi 11 minister, Gabinete Wever-Croes I y II a y ta goberna cu 8 minister. Na 2017, como Partido MEP, a campaña cu ta bay baha e cantidad di minister di 9 pa 7 pasobra loke AVP a haci na 2013 tabata un crimen contra e pueblo di Aruba. AVP a redobla nos debe y asina mes nan a bay di 7 pa 9 minister despues di eleccion 2013. Un motibo cu AVP a haci esaki tawata e presion cu dos candidato riba e lista berde a pone riba lider di e partido pasobra nan mester a bira minister. Señor Mike Eman e tempo ey no por a bisa no tampoco a worry cuanto e e gasto extra tabata y ni cu el a redobla e debe di nos pais, el a pone 9 minister asina mes.
Den e formatie opdracht cu Gobernador a duna e formador e tempo ey, señor Mike Eman, el a indica pa no amplia e cantidad di ministernan pasobra e situacion di pais Aruba ta malo. Señor Eman no a worry cu Gobernador tampoco. El a bay cu su 9 ministernan despues un a baha a bin un di 10 y despues otro a baha y a bin un di 11.
Na 2017 pueblo no a duna Partido MEP e confiansa completo pero a opta pa un coalicion despues di e 8 aña di Gabinete Eman. Negosacionnan a cuminsa pa un coalicion y a purba mas tanto cu ta posibel na yega na 7 minister. Pero esaki no a logra na un forma balansa. A yega e ora na 8 minister pero cu e palabracion cu ta keda na e nivel di gasto di 7 minister cual Gabinete Wever-Croes I a haci tambe.
MIKE EMAN TABATIN 400 HENDE RIBA SU PAYROLL
Señor Eman tabatin 400 hende riba su payroll y Gabinete Wever-Croes tawata tin un maximo di 25 hende. No ta tur Minister a y ta traha cu 25 hende na su bureau pero e ta un maximo cu Gabinete Wever-Croes I y II a mantene na dje. Den e cantidad aki tin esnan di limpiesa, secretariat, conseheronan, y siguridad.
E segundo decision ta cu e salarionan di nos hendenan ta conforme e salario di gobierno cual tambe a yuda pa baha e gastonan y mantene e nivel di gasto di 7 minister.
Elecion 2021 pueblo atrobe ta vota pa un coalicion y a base di esaki a yega na palabracionnan pa un coalicion stabiel entre partido MEP y RAIZ. Y a forma un gobierno stabiel di 8 minister. Ningun momento a contempla pa bay na mas minister apesar, Prome Minister a enfatisa, cu e trabou aworaki ta hopi mas hopi cu e tabata na 2017.
“Aworaki no ta goberna normal manera den pasado sino nos tin cu nabega e crisis aki, sali di e crisis y nos no tin placa”.
Tambe Prome Minister a enfatisa cu otro cos cu ta haci goberna den e tempo aki dificil ta e palabracion cu Hulanda den cuadro di Landspakket. Y e ehecucion di Landspakket ta tuma hopi mas tempo di nos ambtenaarnan y di nos ministernan. Ta proposicion tras proposicion ta bin y como minister, mester maneha esaki y haci e miho escogencia pa e Landspakket wordo ehecuta.
“Tur esaki no a pasa si den pasado gobernantenan prome cu nos, den e caso aki, e gobierno di AVP, a carga su responsabilidad y no hinca nos den un debe asina grandi. Awe nos lo ta mas fuerte para pa sali di e crisis. Pero e gobierno aki, Gabinete Wever-Croes II, ta consisti di hende homber y muhe determina pa saca Aruba di e crisis aki na un forma exitoso. P’esey cada un di nos ta dedica alma y cuerpo, 24 ora, 7 dia pa siman na e trabounan cu mester wordo haci y e trabou ta hopi mas pisa. Ami ta di 2 biaha Minister President y e trabou ta hopi mas pisa”, Prome Minister Evelyn Wever-Croes a enfatisa.
