Despues di e pandemia mundial di Covid-19, Pais Aruba a logra metanan di recuperacion y crecemento economico den 2023, danki na e exito den turismo. Economia a crece cu ‘double digits’ creando miles di cupo di empleo.
“Locual nos no a logra ainda den 2023 ta pa e prosperidad aki yega den cada rincon di nos pais. Ainda tin famianan cu ta pasa den duro, cu mester traha dos, of hasta tres trabou, pa logra cubri e gastonan. Costo di bida a aumenta debi na e inflacion cu nos ta importa riba cada cos cu nos cumpra.
Eseynan lo ta e prioridadnan pa aña 2024. Pa consolida e crecemento cu nos a conoce den 2023, pa duna e stabilidad cu nos mester den nos pais, den nos comercio, den nos hogarnan, pa asina e progreso y prosperidad por yega den hogar di cada ciudadano. Progreso y Prosperidad crea a base di inversion y innovacion.
Meta di Gabinete Wever-Croes II ta pa nos logra establece un isla cu un economia productivo y stabiel, un pais cu por paga su debenan y alaves inverti den su futuro, pa crea oportunidadnan pa nos futuro generacionnan realisa nan soñonan. Un isla cu un desaroyo sostenibel y husto, cu por brinda un calidad di bida cu salud, progreso y felicidad pa un y tur, specialmente pa esnan mas vulnerable. Un comunidad cu ta trata otro cu respet, cu tolerancia y cu ta inclui tur hende den e progreso y prosperidad”, Prome Minister Evelyn Wever-Croes a expresa.
