Prome Minister a reuni cu e Consul General di Republica Dominicana sr. Pedro Ventura, durante un bishita di introduccion di e consul nobo na Prome Minister. E consul nan ta resorta bou di Ministerio di Asuntonan General y pa e motibo aki, nan ta haci nan bishita introductorio na Minister President.
Consul General di Republica Dominicana sr. Ventura y Prome Minister Wever – Croes a papia riba diferente aspecto relaciona cu e colonia Dominicano estableci na Aruba. E colonia aki ta estableci pa hopi tempo caba y ta forma gran parti di nos poblacion. Un otro tema cu a papia di dje ta encera puntonan relevante pa e comunidad Dominicana.
Ademas, e consul general sr. Ventura a extende un invitacion na Minister President, pa haci un bishita na Presidente di Republica Dominicana y pa delibera riba con pa estrecha lasonan entre e dos paisnan. Entre otro, pa mira con Aruba por haci uzo di servicionan medico na Republica Dominicana. E pais ta ofrece cantidad di servicio cu por ta mas favorabel pa Aruba y ciudadanonan, considerando cu nan ta apenas 1 ora leu di Aruba,’ Prome Minister a splica.
Minister President a duna palabra cu e lo delibera cu su coleganan Minister riba e tema aki y a sigura cu Gobierno di Aruba ta hopi interesa den estrecha e lasonan aki. ademas, lo institui gruponan di trabou pa por prepara esaki. Terminado, e consul General a gradici Minister President pa su tempo y su atencion.
