ORANJESTAD,Aruba
Aruba ta cumpliendo cu tur condicion pa por bin na remarke pa haya fiansa. Aruba semper a paga tur su debenan su mes, nunca a haya saneamento di debe, ni regalo. Awor cu Aruba su economia y su pais a kibra, awor cu nos ta benta na suela, Hulanda ta bin klem nos den nos nek, pa kita e poco rosea cu a resta nos.
Prome Minister a expresa su desaprobacion cu Hulanda a tuma lunanan pa prepara e documentonan, y ta brinda e paisnan apenas 4 dia pa por atende cu e documentonan, y riba dje ta duna e unico posibilidad pa bisa “si” sino no ta haya e fiansa.
ARUBA NO TA CONTRA SUPERVISION
Aruba no ta contra e supervision ni reforma, es mas, Aruba mes a propone mas reforma cu Hulanda. Pero Aruba su reforma ta basa riba e vision kico ta miho pa ARUBA y a wordo prepara pa mas cu 100 ciudadano di nos pais. E reformanan cu Hulanda ta propone ta sirbi mas e interesnan di Hulandesnan cu di Aruba.
“Mas aleu Prome Minister Evelyn Wever-Croes a exigi pa e secrecia di e documentonan wordo elimina, pa e por comparti e documentonan cu Parlamento, gremionan y lidernan politico durante e consultanan nacional. Ya caba e Prome Minister di Aruba a haci e peticion ey na Ministerio di Binnenlandse Zaken, pero a wordo nenga. Den su carta Prome Minister di Aruba a skibi “Transparencia pa mi no ta palabra bashi, pami transparencia ta mi forma di proceder, e ta un asunto di principio, y mi no por coopera na un forma di proceder sin transparencia. Y pa e motibo ey mi ta haci e peticion pa kita e caracter di secrecia na e documentonan, pa asina pueblo di Aruba por tin un oportunidad husto pa haya conocemento di e documentonan”, Prome Minister a duna di conoce.
Prome Minister di Aruba ta pendiente pa haya e aprobacion, pa asina por comparti e documentonan cu Parlamento y cu gremionan.
