Mi tin tur confiansa cu Integridad ta den bon man y semper mi lo tey pa yuda”
Durante e periodo di gobernacion di Gabinete Wever-Croes I, Prome Minister Evelyn Wever-Croes tabata tin e cartera di Integridad bou di su encargo. Un cartera cu pa Prome Minister tabata di hopi importancia mirando cu integridad tabata un punto cardinal den e plan di gobernacion. Prome Minister, durante su periodo como Minister di Integridad a traha riba e fundeshi cu Aruba mester pa construi e edificio di integridad. A traves di Bureau Integriteit Aruba a logra construi e departamento aki cu awe ta un realidad.
Prome Minister tambe a traha conhuntamente cu Stichthing Deugdelijkheid Bestuur Aruba riba un National Integrity Scan pa yega na un nul-meting riba e tereno di integridad. E scan aki ta den e fase final y pronto lo wordo presenta na comunidad.
Otro aspecto importante cu Premier Wever-Croes a aporta na dje ta Corporate Governance na unda a yega na diferente palabracion den cuadro di bon gobernacion di nos companianan estatal.
Integridad lo sigui ta importante den e proximo gobernacion di Gabinete Wever-Croes II na unda cu lo sigui construi riba e fundeshi cu ya a wordo crea. Pa Prome Minister e traspaso di e cartera aki ta crea emocionnan mixto mirando tur e esfuerso cu el a pone den e cartera aki. Señor Ursell Arends lo bira e proximo minister cu lo carga e cartera aki y lo sigui construi riba e fundeshi cu a wordo crea durante e 4 añanan di Gabinete Wever-Croes I.
Awe a toca e momento pa traspasa e cartera di Integridad pa sr. Ursell Arends kende ta e minister nobo cu lo ta bay ta encarga cu ne. Manera mi a indica anteriormente e cartera di integridad semper tabata manera un baby pa mi y ta poco dificil pa lag’e bay. Pero mi tin tur confiansa cu e lo ta den bon man y semper mi lo tey pa yuda. Integridad lo sigui hunga un rol primordial den cada ministerio di Gabinete Wever-Croes II,” Prome Minister Evelyn Wever-Croes a finalisa bisando.
