Den cuadro di e conferencia “35 Aña Status Aparte, Aruba ta di Nos Tur”, Prome Minister a reuni cu esnan cu tabata secretario di Conseho di Minister durante e periodo di 35 añanan cu Aruba ta Pais. E reunion tabata sumamente ameno Prome Minister Evelyn Wever-Croes a expresa.
E conferencia ta tuma luga diamars 23 di november cuminsando 9or di mainta te cu 12or di merdia na Marriott Hotel cu un grupo chikito di invitado debi na Covid. Sinembargo e ta wordo transmiti via Telearuba y demas canalnan na Aruba, pa asina tur hende na Aruba por sigui e conferencia aki – 35 aña Status Aparte, Aruba ta di nos tur.
Presente den e reunion tabata señora Alice van Romondt, cu tabata secretaria di Conseho di Minister tempo di Gabinete di s señor Henny Eman. Tambe tabatin señor Peter Davidse, cu tabata secretario di Conseho di Minister den Gabinete di señor Nelson Oduber, señora Nicole Hoevertsz cu tabata secretaria di Conseho di Minster di sr. Mike Eman y sra. Grace Koolman cu tabata y ta secretaria di Conseho di Minister pa Gabinete Wever- Croes.
Premier Evelyn Wever – Croes a splica cu tabata un reunion sumamente interesante den cual cada persona a comparti nan experiencianan durante 35 aña cu Aruba ta Pais segun e parti cu a toca nan. Un aspecto interesante tabata cu a enfoca riba kico tabata e puntonan fuerte cu Aruba a logra e Status Aparte, unda a logra desaroya mas pero tambe a constata cu tin areanan cu si traha mas hunto, lo por logra mas. Por ehempel cultura ta uno cu a wordo menciona cu si tin mas cooperacion den Reino, lo por logra mas.
Señora Nicole Hoevertsz, secretaria di Conseho di Minster di sr. Mike Eman
“Nos a wordo invita door di Prome Minister pa hiba conbersacionnan cu tawata sumamente ameno cu enfoke con nos a desaroya como pais den 35 aña di Status Aparte y kico tawata e rol di secretaris di Conseho di Minister den e 35 añanan. Nos a benificia come pais di Status Aparte. Cada un di nos tawata tin enfasis riba cierto puntonan y realmente e reunion tawata hopi interesante. Mi ta spera cu Prome Minister por sigui cu e iniciativanan aki cu ta sumamente positivo. Cada un di nos ta aporta na un forma of otro na desaroyo di nos pais. Den nomber di e demas secretarionan di Conseho di Minister di Aruba, mi ta gradici Gobierno di Aruba y Prome Minister pa e iniciativa aki”.
Concluyendo Prome Minister a expresa cu e reunion tabata sumamente interesante pa tende con cosnan tabata pasa den añanan 1986 y despues di Status Aparte te cu awo. Como antesala pa e conferencia otro siman, e reunion tabata sumamente valioso.
