ORANJESTAD, Aruba
“Den un solo palabra, decepcionante,” tabata e prome reaccion di lider di fraccion di AVP den Parlamento, sr Marlon Sneek despues cu Presidente di Parlamento a suspende e ‘openbare bijeenkomst’ cu gobierno riba negociacionnan cu ta tumando luga cu Hulanda.
Sr Sneek a mustra cu dialuna ultimo fraccion di AVP a entrega un carta na Parlamento pa asina por haya un reunion meramente pa papia tira e topico aki ya cu di parti di gobierno nan a trata di dek tur cos y laga tur cos pasa bay, keriendo cu tur hende ta na soño.
“Dialuna cu nos a pidi e reunion, ya cu ta for di dia 17 di juli caba nos a manda pidi Prome Minister kico ta e proposicion cu su gobierno a manda Hulanda pero e no a duna nos un contesta.
Den e reunion aki el a haci mesun cos cu el a haci luna pasa, ora cu el a bin duna su speech cu e ta duna tur caminda, sea na cumbre, sea na reunion cu gremionan, a bin tira mesun speech den Parlamento, pa despues e baha na awa.
Luna pasa Evelyn a laga Minister di Finansa Xiomara Ruiz Maduro contesta preguntanan y un biaha mas diahuebs e ta baha na awa, anto ta laga Andin Bikker contesta Parlamento.
Minister Evelyn Wever Croes no ta duna cara y pa nos di fraccion di AVP, Minister Presidente a firma pa entrega e pais aki caba na Hulanda.
Pesey e no por a bin den e reunion aki den Parlamento pa duna cuenta, pasobra tur hende a cuestion’e, pa motibo cu for di Parlamento e no tin un aprobacion pa entrega net net nada, ni un milimeter.
Nos a puntr’e kico e kier men ora el a bisa cu den bida bo tin cu dal un stap atras pa bin bek pero Evelyn Wever Croes bno a bin bek pa contesta Parlamento y nos a sinta warda riba su persona loke a pone cu Presidente di Parlamento a bolbe suspende e reunion ‘tot nadere orde.’
Pues ni Parlamento y ni pueblo di Aruba sa na e momentonan aki na unda nos ta para!
Esey ta e problema grandi cu nos tin, caminda na momento cu bo ta negociando cu punt y coma, ta pasobra bo ta cla pa entrega y nos por a mira tigernan di papel manera Endy Croes, kende awor ta pidi pa bin cu CFT numa!
Nos ta corda 6 di Juni, gai poyoyo, gritando den Parlamento pa Hulanda tende, “bo cabes no ta bon, nos ta cambia e ley y bo no tin nada di bisa akinan,” y awe e kier scapa un Rijkswet y ta core bisa Hulanda pa bin cu CFT numa, increibel!
Nos por a scucha Minister Andin Bikker ta papia di con nos no ta traha riba protocol, di con no ta traha riba acuerdo, pero Shonnan e problema cu nos tin awe ta pa motibo cu e gobierno aki na luna di november di 2018, a firma un protocol y no a cumpli cune.
Tur hende ta lubida cu na december di 2019 a manda yama Prome Minister Evelhyn Wever Croes na Hulanda pa ranca su orea pa motibo cu el a firma un protocol pero nnca a cumpli cu loke el a firma.
E fraccion di MEP ta esun cu a grita den Parlamento, cu CFT no tin nada di bisa na Aruba y cu nan a bira un advies orgaan di Parlamento no di Rijksministerraad y cu Rijksministerraad no tin nada di bisa aki!
Awor Endy Croes moli moli ta bisa pa bin cu CFT numa, cu nan ta willing pa bay di acuerdo pa cambi’e, bo no por ta serio, bo ta kere cu ta un wega e cos aki ta.
Ora cu tabatin un welga di hamber akinan dilanti di oficina di gobernador, tabata pa bin c’un Landsverordening Financieel Toezicht pa e pais aki y Parlamento dicidi ki dia e ta bin y ki dia e ta caba.
Awe e parlamento cu nos tin, y tur hende mester por corda cu dia 27 di augustus 2015 nan a trata di kima e edificio di Parlamento y awe ta bin dilanti y practicamente roga pa mesun cos pa cual bo kier a destrui e edificio di parlamento, basta no bin cu e rijkswet.
Pues hendenan cu no tin principio, hendenan cu no ta para pa nada, esey tra e problema cu e pais aki tin na e momentonan aki, un Minister Presidente cu no tey pa duna cara.
Diahuebs un biaha mas el a demostra esey caminda el a bin Parlamento mainta y tira su speech bunita y despues sali na careda.
Ora cu e mester a contesta pregunta di cada un miembro di Parlamento, e no tabata tey pa duna contesta ya cu e tin un otro compromiso pero con Evelyn por tin un otro compromiso riba e mensahe cu e tin cu bisa pueblo na unda e pais ta para na e momentonan aki den man di su gobierno.
Pa bisa pueblo cu bo ta bay entrega autonomia di e pais, pa bisa pueblo cu Hulanda ta bay tuma over enseñansa, husticia, economia, caminda pa colmo Minister di Economia no a duna ni acto di presencia den e reunion na Parlamento yvolksgezondheid tambe ta bay pa Hulanda.
Kico por ta mas importante cu esey cu Prome Minister Evelyn Wever Croes no por duna splicacion na pueblo di con pais Aruba ta bayendo bek atras, bek pa aña 1954 tempo cu nos tabatin un Bestuurcollege y awor e lo bira pio cu esey.
Practicamente por conclui por wel bien deshaci di Parlamento ya cu Parlamento no tin nada mas di bisa y Ministernan di Aruba no tin nada mas di bisa y na Den Haag nan ta bay schrap y bisa kico ta locual ta bay pasa y kico lo no pasa na Aruba.
Esaki ta algo inaceptabel ya cu e decision ey ta un decision cu pueblo di Aruba tin cu dicidi ariba y ta un decision cu pa medio di un referendum tin cu wordo dicidi pero aki nos por mira un Prome Minister Evelyn Wever Croes, scondi scondi ta bezig ta fix cos pasobra e no kier bin duna cara.
Su parlamentarionan y nos di fraccion di AVP a mustr’e cu we no tin autorisacion di Parlamento pa tuma e decision ey anto mayan e haya su mes ta bisa cu den Parlamento a wordo bisa cu si of cu no anto el a haci lo contrario.
Ta pesey el a bay sconde y ta pesey e no a bin bek y pa fraccion di AVP esey sigur ta inaceptabel,” lider di fraccion AVP, Marlon Sneek a declara.