E parti Karibense di Reino ta trahando, manera planiá, pa rondó di 15 di febrüari 2021 kuminsá ku bakunashon kontra Covid-19. RIVM ta prepará pa manda e promé bakunanan. Pa Saba i St. Eustatius ta trata di entrega di e promé bakuna- Moderna. Pa Boneiru i paisnan KAS (Kòrsou, Aruba i St. Maarten) ta trata di e promé fase di bakuna di BioNTech/Pfizer.
Trabou intensivo
Minister Zita Jesus Leitu (Kòrsou), Minister Danguillame Oduber (Aruba), Minister Richard Panneflek (Sint Maarten) i Sekretario di Estado Paul Blokhuis (Hulanda) a konfirmá konhuntamente den e enkuentro di kuater pais, ku nan ta perkurá pa tur adulto den e parti karibense di reino tin e posibilidat pa bakuná. E dignatarionan a konkluí huntu ku eksperto den bakunashon Marc Sprenger, ku ta tur esnan envolví ta trahando intensivamente pa por ta kla na tempu, pa por ehekutá e kampaña di bakunashon i ta konvensí ku e promé gruponan por risibí e bakuna rondó di 15 di febrüari. Tambe den e parti karibense di Reino esaki ta trese perspektiva èkstra pa por yega na un final di e krísis di Corona. Ta hasi tur esfuerso pa terminá e kampaña di bakunashon riba tur e islanan promé ku komienso di temporada di orkan.
Konsehero di bakuna
Riba enkargo di Sekretario di Estado Paul Blokhuis (VWS), dr. Marc Sprenger (ántes direktor di RIVM), konsehero di bakuna ta duna asistensia na e islanan den e parti karibense di Reino pa por kuminsá, segun planifikashon, ku e bakunashon. E konsehero di bakuna, huntu ku RIVM, a bishitá tur e islanan pa por papia tokante e desaroyonan huntu ku tur esnan envolví. A entregá e aparatonan nesesario i a train e personal konserní den ‘cold chain’ i maneho di bakuna. E konsehero di bakuna huntu ku RIVM a determiná algun punto di akshon mas. Si por kumpli ku eseinan, por kuminsá ku e programa di bakunashon.
Moderna i BioNTech/Pfizer
Na Boneiru, Kòrsou, Aruba i St. Maarten, lo ofresé trahadónan den kuido i personanan riba 60 aña e bakuna BioNTech/Pfizer. Pa por traha mas efektivamente i minimalisá desperdisio di e bakuna, ta duna tur adulto riba e islanan di Saba i St. Eustatius e oportunidat pa pasa e bakuna Moderna.
Ta entregá i distribuí e promé bakunanan den diferente fase
