ORANJESTAD,Aruba
Dr. Horacio E. Oduber Hospital orguyosamente ta
duna di conoce cu a cuminsa cu e prome donante di plasma, kende tabata infecta cu
COVID-19, p’e investigacion di Arucovid. E prome donante di plasma ta Jeroen van Geest
cu ta traha na Respaldo. Na momento cu ela haya sa cu Hospital lo cuminsa cu un
investigacion y e ta bin na remarca, mesora el a aplica. “Mi no a pensa esaki dos biaha
paso no tin ningun desbentaha den participa y duna plasma como ex-pashent di
coronavirus sino mas bien mi ta haya cu ta mi deber pa haci esaki”, asina sr. van Geest a
duna di conoce.
Pa Hospital esaki tabata un dia bunita pa tin e prome donante cu ta duna plasma, asina
Drs. Zaheeb Choudhry, Nefrologo, a duna di conoce. Manera ta conoci, pashentnan cu
tabata infecta cu COVID-19 y a recupera, awo tin anticuerpo cu lo por sirbi pa cura
pashentnan cu wordo contagia cu COVID-19 y wordo interna na Hospital. Ta importante
pa remarca cu esaki ta un investigacion na Aruba cual na otro parti di mundo ta
dunando bon resultado. Internacionalmente a trata 50 pashent caba cu plasma cu a ser
contagia cu COVID-19 y tur a recupera.
Te cu awo mas o menos 10 persona na Aruba cu tabata infecta cu COVID-19 a aplica
pa duna plasma. Ta importante pa menciona cu tin preferencia pa hende hoben y sin
enfermedad, pues hende cu ta fit. “Tin suficiente plasma den stock awo pa trata
pashentnan cu wordo interna na Hospital, si Aruba conoce un di dos ola di COVID-19,”
asina drs. Choudhry a duna di conoce. For di e prome donante sr. Jeroen van Geest a
saca 800ml y cu esaki lo por trata te cu 4 pashent cu ne.
Jeroen van Geest a duna di conoce cu su experencia cu e virus tabata uno suave,
compara cu otro hende. Pa 3 dia e tabata sinti’e hopi malo, dolor di cabes y keintura,
pero no a haya e otro sintomanan manera tosamento y problema respiratorio. Jeroen
van Geest a tuma e oportunidad pa gradici e team di Respaldo completo y
specialmente tur cu a traha hopi duro riba piso, esta nursenan y huishoudelijk dienst.
Hunto nan a cera cabes ora a haya nan mes confronta cu e crisis na Respaldo. E ta
orguyoso con nan a handle e situacion, contene e virus na Respaldo y alabes ta contento
cu tur clienten y empleado a recupera.
Drs. Choudhry tambe a gradici su team cu ta traha hopi duro y ta haci esaki cu curason.
Nan ta aki p’e hendenan di Aruba y lo sigui bay dilanti cu un solo meta cual ta combati
e virus.
