OM ta acusa Benny Sevinger di a beneficia su amigonan cu tereno di Gobierno.Tres acusado a sinta mainta dilanti mesa berde y e hues cu a bini di Hulanda specialmente pa e caso aki. Unico cos cu a haci tabata repasa e dossier di Fundacion Curason Berde cu tabata ricibi e donacion pa campaña di Benny Sevinger.
E ex minister y awo Parlamentario a bisa cu tin cierto casonan e tabata sa cu comerciantenan cu e conoce of cu ta amigo di dje a haci donacion pa su campaña via di e fundacion. “Pero cuanto placa nan a duna, mi no sa.” E motibo cu e no sa ta pasobra su team tabatin consisti di 70 persona y e mes directamente no tabata envolvi cu recaudamento di fondo. E ta sinta den reunion cu su team pa discuti ki material nan tin mester ainda.
Aunke cu e tabata core bicicleta casi tur dia cu e acusado Pieter Susebeek, kende tabata traha na DIP y tabata na su disposicion, el a bisa cu e no a previligia e persona aki. E sa cu Susebeek tabata bezig cu diferente proyecto pero ta nenga cu el a firma un peticion di tereno pasobra e ta su amigo. E peticion aki a wordo haci hopi antes. Pero riba dje, momento cu e haya un peticion pa firma, e ta simplemente e ta firma “di acuerdo” pero no ta wak nomber. E ta Sali for di e punto di bista cu tur hende tin mesun derecho.
Fiscal y OM sinembargo ta kere lo contrario. E cas di dos piso cu e tin, balora n a mey miyon florin, ta construi cu material cu el a haya for di personanan cu despues a haya tereno for di dje, manera Susebeek. “Esaki no ta berdad. Mi mes a traha e cas aki. Si a paga man di obra, anto esey a bay pa mi mes. Susebeek ta un bon amigo y ta den construccion. E sa unda tin bon prijs of oferta. Ora cu e informa mi di algo asina, mi ta dun’e e placa pa bay cumpra nan pa mi. Como Mininister mi no tin tempo. Mi chauffeur of bode tambe tabata haci mi e fabor aki,” e acusado a splica Hues.
Curt Harms a admiti cu e periodo cu ta papia di dje a sponser solamente Sevinger y AVP, pero esaki ta debi cu nan tabata impresiona cu su trabou y otro plannan di infrastructura cu e tabatin. E ta admiti di a bisa e minister cu e ta interesa pa desaroya un hotel y a haya e cooperacion pa esaki. Pero esey no ta motibo cu el a hinca placa den campaña di Sevinger como gradicimento.
A papia tambe di un suma di mas di 2 miyon florin cu tin riba un cuenta na Corsou cu OM ta bisa ta pertenece na Sevinger, aunke e cuenta no ta riba su nomber. E acusado ta nenga esaki.
E labamento di placa e no ta compronde. Pero Fiscal a bisa cu den su rekisitorio e lo splica esaki. Esta cu e circulo ta mustra el a haya placa ilicito of di forma ilicita.
E parti di soborno di e politico ora cu e tabata mandatario y labamento di placa, pa su Fundacion Curason Berde, a finalisa diaranson mainta y awo e tratamento lo sigui otro luna.