Recientemente, riba 28 di juni 2023, a concretisa y oficialisa un acuerdo entre dos bufete di abogado. Cu e acuerdo aki pa prome biaha nos por papia di un establecimento di e prome bufete Americano riba e islanan di Caribe Hulandes, en particular Aruba. Esaki a bira un realidad door di asociacion di e bufete local di abogado David Kock cu e oficina di abogado Americano Diaz Reus & Targ LLP cu tin oficinanan na diferente ciudad Mericano y rond mundo, cu nan cede principal na Miami. Na Aruba e bufete lo opera bou di e nomber di ‘DavidKock – DiazReus’.
Segun David Kock, Aruba tin un historia y lasonan comercial y turistico fuerte cu Merca. Na turismo e isla ta ricibi mas di un miyon bishitante Mericano y esaki ta genera ‘issues’ legal. Por pensa riba contratonan cu ta wordo cera, manera compra di cas/condominium of otro propiedad. Esakinan ta rekeri asistencia legal. E bisihitantenan aki tambe por wordo confronta cu ‘issues’ durante nan estadia manera accidente, pero hasta asuntonan di indole criminal of di inmigracion, cualnan lo resulta den conflictonan cu mester asistencia di abogado. Naturalmente esaki ta pasa na Merca tambe, pues pa e Arubiano bishitando Estados Unidos of cu lo por tin asuntonan di inmigracion of hasta criminal, kende lo mester di ayudo riba teritorio Americano.
Fuera di esaki, tin tambe asuntonan comercial. Merca ta un di e partnernan mas grandi di Aruba ora ta trata comercio y tin dus hopi actividad comercial cu ta tuma luga entre e dos paisnan aki. Desde e financiamentonan di e banconan Americano te na compra y shipping di mercancia of e servicionan cu ta wordo brinda. Den tur e trayectonan aki tin asuntonan legal cu ta aplica pa e empresa Americano pero tambe pa empresarionan Arubiano cu ta haci negoshi cu esunnan na Merca.
Pa tur e situacionnan aki, awor por conta cu bufete Americano na Aruba mes cu lo por asisti tur persona y e empresanan, sea si e asunto mester wordo atendi na Aruba of na Merca.
David Kock ta kere cu esaki ta trece un dinamica nobo y unico den abogacia local y e ta sumamente satisfecho y honra cu un bufete di e categoria y caliber di Diaz Reus & Targ LLP a acepta di asocia nan mes cu nos y haci’e partner di nan organisacion.
E bufete Americano DiazReus y especialmente su socio fundador, señor Michael Diaz, ta un abogado sumamente reconoci y renombra cu clientenan internacional famoso y tambe empresanan grandi di nombernan conoci (www.diazreus.com).
