E biaha aki “Scol Duna un Man” tabata e ganador absoluto!
Na December ultimo, net prome cu dianan di fiesta, AFAS Foundation, representa pa Sr. Rothmar Coenraad, Project leider AFAS Foundation aki na Aruba, tabata tin e ceremonia oficial di anuncia e ganador di e di dos (2) edicion di “Haci bo Scol Bunita”.
Durante di un bishita di trabow, na Maart 2022, miembronan di directiva di AFAS Foundation, Madeleen y Roos, a haci un yamada na tur scolnan di Aruba pa participa na e proyecto. Den e edicion menciona, a participa en total 10 scol, cu mester a entrega nan “project dossier” prome cu Juli 1, 2022. E biaha aki e peticion a hiba un mensahe especifico, den cual a pidi e scolnan pa aplica e tema vitalidad den e ehecucion di e proyecto.
E bunita proyecto aki ta un iniciativa di AFAS Foundation cu a y ta wordo carga pa un grupo di Project-Leiders di AFAS di Hulanda, Corsow y Aruba. Tur scol na Aruba a haña un invitacion por escrito pa presenta un proyecto cu su respectivo plan y presupuesto. E invitacion obviamente a inclui e reglanan basico, stipula door di AFAS Foundation, cu tabata requeri pa por ricibi aprobacion, y alavez indicando cu e proyecto lo mester wordo ehecuta exclusivamente cu ayudo di voluntarionan.
For di Oktober 1, 2022, un grupo grandi di docente, voluntario y naturalmente e studiantenan di e respectivo scolnan, a traha incansablemente pa por a caba cu nan proyecto prome cu e fecha stipula. AFAS Foundation, pa medio di su Project Leider, a percura pa cada scol haña un cuenta na e tienda di Kooyman riba Watty Vos Boulevard, caminda nan por a bai “cumpra” e materialnan necesario pa nan proyecto di embeyecimiento. Por menciona cu varios gymzaal, cantina y speeltuin tabata suheto na un cambio total di imagen. Mester remarca, cu e grupo di voluntarionan a haci un tremendo trabow, pues hasta e periodo di yobida no a stop e trabownan di wordo ehecuta.
Naturalmente, e tabata un “batalla” pa por gana e premio maximo di e proyecto. Durante e ceremonia ariba menciona, e ganador absoluto, Scol Duna un Man, a ricibi no menos cu AWG 10,000.00 extra, cual e scol awor por usa pa otro proyectonan di embeyecimiento.
Rothmar Coenraad: ‘Alegria! Un biaha mas e voluntarionan a haci un trabow fantastico. Bo por logra masha hopi mes door di inspira otro. Tabata sumamente dificil pa escoge un ganador, pa motibo cu cada un scol a entrega un bunita resultado final, cual obviamente nan mes ta bai disfruta di dje den e proximo añanan. Mi a disfruta masha hopi cu e edicion aki, pues mi ta cla pa e siguiente.
AFAS Caribbean, ta sumamente contento di por haci un contribucion pa medio di AFAS Foundation. Nos ta sumamente entusiasma pa wak kiko ta bai bira e siguiente proyectonan ariba e islanan. Nos ta sumamente agradecido na AFAS Foundation.
Tocante AFAS Foundation:
AFAS Foundation ta e expresion mas puro y bunita di e compania AFAS Software. E ta refleha unda e curason di e empresa ta. E fundacion ta pa tur hende, sin importa di cua parti di mundo e peticion pa ayudo ta bini, y ta independiente di creencia, orientacion, genero of e color di e persona. AFAS Foundation ta pone placa disponibel pa proyectonan rond di mundo y ta apoya proyectonan den e areanan di salud, educacion y sociedad. Manera ta custumber di AFAS, tur loke ta wordo haci ta basa ariba innovacion y transparencia. AFAS Foundation kier logra un impacto substancial tanto local como na nivel internacional.
