For di luna di mart 2022 no ta pèrmití pa bende ni suministrá saku, pipa pa bebe kuné
i fòrki, kuchú i kuchara di plèstik mas na Boneiru. Despues di 8 luna e prohibishon akí ta konta
tambe pa empake di stirofom pa kuminda. Den e periodo di transishon empresanan por kaba ku
nan stòk di plèstik desechabel.
Gradualmente lo amplia e produktonan prohibí di plèstik desechabel. Den e fase aktual esakinan
ta saku, pipa pa bebe kuné i fòrki, kuchú i kuchara di plèstik i empake di stirofom pa kuminda.
Selekshon di e produktonan akí ta basá riba sosten amplio bou di e partidonan konsultá. Manera
negoshinan di benta por mayor, supermarket- i restorantnan, TCB, Duana i Selibon.
Entidat Públiko Boneiru ta aspirá un Boneiru mas limpi ku ménos shushi kantu di kaminda i den
naturalesa pa un ambiente di biba mas salú. Ku e prohibishon akí nan ta spera di redusí e kantidat
di plèstik desechabel na Boneiru. E kantidat grandi di plèstik desechabel den laman i riba tera ta
oumentando tur aña ainda. Esaki ta dañino pa nos medio ambiente. Un Boneiru liber di plèstik ta
saludabel pa su habitantenan, krusial pa medio ambiente, atraktivo pa turismo i ku esei bon pa
ekonomia.
Resientemente diputado Kroon a presentá e ordenansa ku ta kontené e prohibishon di plèstik
desechabel den Konseho Insular. Konseho Insular a bai di akuerdo ku e ordenansa insular pa
prohibí plèstik desechabel (plèstik di un solo uso) seis luna despues di nan aprobashon. E
prohibishon ta enfoká riba benta i suministro di plèstik desechabel.
Dentro di poko ta kuminsá un kampaña di informashon kaminda Entidat Públiko Boneiru lo
kompartí mas informashon ku empresarionan i habitantenan.
